બોલિવૂડ અભિનેત્રી શિલ્પા શેટ્ટીના પતિ અને બિઝનસમેન રાજ કુન્દ્રાની પોર્ન વીડિયો બનાવવાના આરોપસર જુલાઈમાં મુંબઈ પોલીસે રાજ કુન્દ્રાની ધરપકડ કરી હતી. સપ્ટેમ્બર મહિનામાં તેને જામીન મળ્યા હતા અને તે જેલમાંથી બહાર આવી શક્યો હતો. જેલમાંથી બહાર નીકળ્યા પછી રાજ ભાગ્યે જ જાહેરમાં જોવા મળ્યો છે અને હવે તેણે પહેલીવાર સમગ્ર બાબતે મૌન તોડ્યું હતું.
કુન્દ્રાએ કહ્યું કે તે ટ્રાયલ માટે તૈયાર છે અને તેને આશા છે કે સત્ય સામે આવશે. રાજ જણાવે છે કે, મને અને કેસને લગતા અનેક ગેરમાર્ગે દોરતા નિવેદનો અને આર્ટિકલ બહાર આવી રહ્યા છે. આ તમામ બાબતો પર ચિંતન કરતા મને સમજાયું કે મારા મૌનને મારી નબળાઈ માનવામાં આવે છે. સૌથી પહેલા તો હું કહેવા માંગીશ કે હું ક્યારેય જીવનમાં પોર્નોગ્રાફીના પ્રોડક્શન અને વિતરણ સાથે સંકળાયેલો નહોતો. કેસ હજી પણ ચાલી રહ્યો છે માટે હું વધારે ખુલાસા નહીં કરી શકુ. પરંતુ દુર્ભાગ્યવશ મારા પરિવાર અને મીડિયાએ મને ગુનેગાર માની લીધો હતો અને મારે ઘણી પીડાનો સામનો કરવો પડ્યો છે. મારા માનવ અને બંધારણીય અધિકારોનું હનન થયું છે.
રાજ કુન્દ્રાએ લોકોને વિનંતી કરી છે કે તેના અંગત જીવનનું સન્માન કરવામાં આવે. રાજ કહે છે કે, હું સ્પષ્ટપણે કહેવા માંગુ છું કે હું શરમથી મારો ચહેરો નથી છુપાવતો, પરંતુ હું ઈચ્છુ છું કે મારી પ્રાઈવસીમા કોઈ દખલ ના કરે. મારો પરિવાર મારી પ્રાથમિકતા છે. અત્યારે મારા પરિવાર સિવાય બીજી કોઈ બાબત મારા માટે મહત્વની નથી. સન્માન સાથે રહેવાનો હક દરેક વ્યક્તિને છે.
