પાકિસ્તાનની પોલીસ રવિવારે ભ્રષ્ટાચારના એક કેસમાં ભૂતપૂર્વ વડાપ્રધાન ઇમરાન ખાનની ધરપકડ કરવા માટે તેમના લાહોર સ્થિત નિવાસસ્થાને ગઈ હતી, પરંતુ ઇમરાન ખાન ગાયબ થઈ ગયા હતા. 28 ફેબ્રુઆરીએ ઈસ્લામાબાદના એડિશનલ સેશન જજ ઝફર ઈકબાલે તોશાખાના કેસમાં ઈમરાન ખાન વિરુદ્ધ બિનજામીનપાત્ર વોરંટ જારી કર્યું હતું. ઈમરાન પર આરોપ છે કે તેમણે વિદેશથી મળેલી ભેટોને સરકારી તિજોરીમાં જમા ન કરાવી અને તેનો ઉપયોગ પોતાના માટે કર્યો અને તેને બજારમાં વેચી દીધો. આ મામલામાં પાકિસ્તાનના ચૂંટણી પંચે પણ ઈમરાન ખાનને ગેરલાયક ઠેરવ્યા છે.
ઇમરાન ખાનની પાર્ટી પાકિસ્તાન તહરીક-એ-ઈન્સાફના વરિષ્ઠ ઉપાધ્યક્ષ ફવાદ ચૌધરીએ ધરપકડ સામે ચેતવણી આપી હતી કે જો શાહબાઝ શરીફની સરકાર પૂર્વ વડાપ્રધાન ઈમરાન ખાન વિરુદ્ધ પગલાં લેશે તો દેશની સ્થિતિ વધુ ખરાબ થશે. ઈમરાન ખાનની ધરપકડ કરવાનો કોઈ પણ પ્રયાસ પરિસ્થિતિને ગંભીર રીતે બગાડશે. હું આ અસમર્થ અને પાકિસ્તાન વિરોધી સરકારને ચેતવણી આપવા માંગુ છું કે તે દેશને વધુ મુશ્કેલીમાં ન નાખે અને સમજદારીથી કામ કરે. તેમણે પાર્ટીના કાર્યકરોને જામ પાર્ક પહોંચવા માટે પણ આહ્વાન કર્યું હતું.ઈમરાન ખાનના ઘરની બહાર સમર્થકોની ભારે ભીડ એકઠી થઈ ગઈ હતી.
ઈસ્લામાબાદ પોલીસે પોતાના ટ્વીટમાં કહ્યું કે તેઓ કોર્ટના આદેશ મુજબ લાહોર પહોંચ્યા હતા અને ઈમરાન ખાનને તેમની સુરક્ષામાં ઈસ્લામાબાદ લઈ જવામાં આવશે. પોલીસે કહ્યું કે જે લોકો કોર્ટના આદેશના અમલમાં અવરોધ ઉભો કરવાનો પ્રયાસ કરશે તેમની સામે કાયદેસરની કાર્યવાહી કરવામાં આવશે.
