વડાપ્રધાન નરેન્દ્ર મોદીને થિમ્પુના ટેન્ડ્રેલથાંગ ખાતે એક જાહેર સમારંભમાં ભૂતાનના મહામહિમ રાજા દ્વારા દેશના સર્વોચ્ચ નાગરિક ખિતાબ- ઓર્ડર ઓફ ડ્રુક ગ્યાલ્પો એનાયત કરવામાં આવ્યો હતો. વડાપ્રધાન મોદી પ્રથમ એવા વિદેશી નેતા છે જેમને આ પ્રતિષ્ઠિત એવોર્ડ આપવામાં આવ્યો હોય.
ભૂતાનના મહામહિમ રાજાએ ડિસેમ્બર 2021માં તાશિછોડઝોંગ, થિમ્પુ ખાતે આયોજિત દેશના 114મા રાષ્ટ્રીય દિવસની ઉજવણી દરમિયાન આ પુરસ્કાર આપવાની જાહેરાત કરી હતી. આ પુરસ્કાર માટે ભારત-ભૂતાન મિત્રતા અને તેમના લોકો કેન્દ્રિત નેતૃત્વને મજબૂત કરવામાં વડાપ્રધાન મોદીના યોગદાનની નોંધ લેવામાં આવી હતી. આ પુરસ્કાર તેમના નેતૃત્વ હેઠળ વૈશ્વિક શક્તિ તરીકે ભારતના ઉદયને પણ સન્માનિત કરે છે અને ભારત સાથે ભૂતાનના વિશેષ બંધનની ઉજવણી કરે છે. વડાપ્રધાને ભારપૂર્વક જણાવ્યું હતું કે આ પુરસ્કાર ભારતના 1.4 બિલિયન લોકોને આપવામાં આવેલ સન્માન છે અને બંને દેશો વચ્ચેના વિશિષ્ટ અને અનોખા સંબંધોનું પ્રમાણપત્ર છે.
