ગુજરાતમાં ગુરુવારે પેટ્રોલના ભાવ પ્રથમ વખત લિટર દીઠ રૂા.100ને વટાવી ગયા હતા. પેટ્રોલના ભાવમાં ગુરૂવારે 29 પૈસાનો વધારો થયો બાદ અમદાવાદ સહિત રાજ્યના 15 શહેરમાં પેટ્રોલના ભાવે સદી ફટકારી છે. અમદાવાદમાં પેટ્રોલનો ભાવ પ્રથમ વખત રૂ. 100 પર પહોંચ્યો છે જ્યારે અમદાવાદ ઉપરાંત રાજ્યના અન્ય શહેરોમાં પણ પેટ્રોલ રૂ. 100 કે તેના કરતા વધુ ભાવે વેચાઈ રહ્યું છે. ભારતમાં છેલ્લાં એક વર્ષમાં પેટ્રોલના ભાવમાં આશરે 30 ટકાનો ઉછાળો આવ્યો છે.
અમદાવાદમાં છેલ્લા કેટલાક સમયથી પેટ્રોલના ભાવ રૂ. 98ની આસપાસ રહેતા હતા. લગભગ એક મહિના કરતા વધુ સમય સુધી આ ભાવ સ્થિત રહ્યાં બાદ છેલ્લા દશેક દિવસથી પેટ્રોલના ભાવોમાં થઈ રહેલા સતત વધારાના પગલે ઈતિહાસમાં પહેલીવાર અમદાવાદમાં પેટ્રોલના ભાવ રૂ. 100 પર પહોંચી ગયા છે.
