ભારતના વિદ્યાર્થીઓમાં અમેરિકામાં અભ્યાસના ટ્રેન્ડમાં સતત વધારો થઈ રહ્યો છે. 2022ના વર્ષમાં અગાઉના વર્ષની તુલનાએ ભારતના વધુ વિદ્યાર્થીઓ અમેરિકા ગયાં હતાં, જ્યારે ચીનના વિદ્યાર્થીઓની સંખ્યામાં ઘટાડો થયો હતો. 2021ની તુલનામાં 2022માં ચીનના વિદ્યાર્થીની સંખ્યામાં 24,796નો ઘટાડો થયો હતો, જ્યારે ભારતના વિદ્યાર્થીઓની સંખ્યામાં 64,300નો વધારો થયો હતો.
યુએસ ઇમિગ્રેશન અને કસ્ટમ્સ એન્ફોર્સમેન્ટે તેના વાર્ષિક અહેવાલમાં જણાવ્યું હતું કે ચીન અને ભારતના વિદ્યાર્થીઓની સંખ્યાને કારણે એશિયા સૌથી વધુ વિદ્યાર્થીઓ મોકલનારો ખંડ બન્યો હતો.
સ્ટુડન્ટ એન્ડ એક્સચેન્જ વિઝિટર પ્રોગ્રામ (SEVP) મુજબ 2021ની સરખામણીમાં 2022માં કિન્ડરગાર્ટનથી લઇને ગ્રેડ 12 સ્કૂલ્સમાં પ્રવેશ લેનારા આંતરરાષ્ટ્રીય વિદ્યાર્થીઓની સંખ્યામાં 7.8 ટકા વધારો થયો હતો.
અમેરિકાના તમામ ચાર પ્રદેશોમાં 2021ની સરખામણીમાં 2022માં આંતરરાષ્ટ્રીય વિદ્યાર્થીઓની સંખ્યામાં વધારો જોવા મળ્યો હતો. આ વધારો 8થી 11 ટકાની રેન્જમાં રહ્યો હતો.
કેલેન્ડર વર્ષ 2022માં રોજગાર અધિકૃતતા દસ્તાવેજ (EAD) અને કંપની માટે નોકરી કરતાં હોય તેવા પ્રિ-એન્ડ પોસ્ટ-કમ્પલીશન ઓપ્શનલ પ્રેક્ટિકલ ટ્રેનિંગ (OPT) વિદ્યાર્થીઓની સંખ્યા આશરે 1.17 લાખ હતી, જે 2021ના વર્ષમાં આશરે 1.16 લાખ હતી. આમ આ સંખ્યામાં 1.4 ટકાનો વધારો થયો હતો.
કેલેન્ડર વર્ષ 2022માં આંતરાષ્ટ્રીય વિદ્યાર્થીઓને એડમિશનની મંજૂરી ધરાવતી SEVP સર્ટિફાઇડ સ્કૂલોની સંખ્યા 7,683 હતી. જે 2021ની 8,038 સ્કૂલોની સરખામણીમાં 400નો ઘટાડો દર્શાવે છે. 2022માં કેલિફોર્નિયામાં આંતરરાષ્ટ્રીય વિદ્યાર્થીઓની સંખ્યા 225,173 હતી, જે અમેરિકાના કોઇપણ રાજ્ય કરતા વધુ છે. કેલિફોર્નિયામાં કુલ આંતરરાષ્ટ્રીય વિદ્યાર્થીઓમાંથી 16.5 ટકા વિદ્યાર્થીઓ હતાં.
એશિયામાંથી આવતા એક્ટિવ એફ-1 અને એમ-1 વિદ્યાર્થીઓની કુલ સંખ્યામાં 2021ની સરખામણીમાં 2022માં 68,677નો વધારો થયો હતો.
અમેરિકામાં કુલ આંતરરાષ્ટ્રીય વિદ્યાર્થીઓમાંથી 70 ટકા વિદ્યાર્થીઓ એશિયાને પોતાનું વતન ગણાવે છે. અગાઉના વર્ષની સરખામણીમાં ઓછા વિદ્યાર્થીઓઓ મોકલનારા અન્ય એશિયન દેશોમાં સાઉદી અરેબિયા (-4,115), કુવૈત (-658) અને મલેશિયા (-403)નો સમાવેશ થાય છે.
