ભારતમાં છેતરપિંડી અને મની લોન્ડરિંગના આરોપોનો સામનો કરવા માટે પ્રત્યાર્પણની લડાઈ હારી ગયેલા અને લંડનમાં પાંચ વર્ષથી જેલમાં બંધ એવા ભારતના ભાગેડુ ઉદ્યોગપતિ તથા હીરાના વેપારી નીરવ મોદીની નવી જામીન અરજી મંગળવારે યુકેના જજ દ્વારા તે “નોંધપાત્ર જોખમ” ઊભો કરે છે તેમ જણાવી નકારી કાઢવામાં આવી હતી.
52 વર્ષીય મોદી લંડનની વેસ્ટમિન્સ્ટર મેજિસ્ટ્રેટ કોર્ટમાં જામીનની સુનાવણી માટે હાજર થયા ન હતા પરંતુ તેમનો પુત્ર અને બે પુત્રીઓ હાજર રહ્યા હતા.
ડિસ્ટ્રિક્ટ જજ જ્હોન ઝાનીએ ટૂંકી સુનાવણી પછી તેમના ચુકાદામાં તારણ કાઢ્યું હતું કે “હું સંતુષ્ટ છું કે જામીન સામે નોંધપાત્ર કારણો બાકી છે. એક વાસ્તવિક, નોંધપાત્ર જોખમ રહેલું છે કે અરજદાર [નીરવ મોદી] કોર્ટમાં હાજરી આપવામાં નિષ્ફળ જશે અથવા સાક્ષીઓ સાથે દખલ કરશે. આ કેસમાં, કોઈપણ સ્તરે, ખૂબ જ નોંધપાત્ર છેતરપિંડીના આરોપનો સમાવેશ થાય છે… એક પણ એવો મુદ્દો નથી કે જ્યાં જામીન આપી શકાય અને અરજી નકારી શકાય.”
CPS બેરિસ્ટર નિકોલસ હર્ને કોર્ટને જણાવ્યું હતું કે “તેમણે ભારતીય અદાલતમાં આરોપોનો સામનો ન કરવા માટેનો તેમનો સંપૂર્ણ નિશ્ચય દર્શાવ્યો છે અને પ્રશ્નમાં છેતરપિંડી USD 1 બિલિયનથી વધુ છે, જેમાંથી માત્ર USD 400 મિલિયન જ જપ્ત કરવામાં આવ્યા છે તે કહેવું અતિશયોક્તિ નથી. તેથી, તે હજુ પણ વિવિધ અધિકારક્ષેત્રોમાં નોંધપાત્ર સંસાધનોની ઍક્સેસ મેળવી શકે છે”
મોદીના બેરિસ્ટર એડવર્ડ ફિટ્ઝગેરાલ્ડે કોર્ટને જણાવ્યું હતું કે ‘’ડાયમંડ હોલ્ડિંગ્સ, જ્યાં મોદી સીઇઓ છે, ત્યાં તેમને રોગચાળા અને વૈશ્વિક મંદીને કારણે નુકસાન સહન કરવું પડ્યું છે અને માત્ર GBP500,000 ઓફર કરવામાં સક્ષમ છે. આર્થિક ગુનાઓના આરોપો માટે તેમની અટકાયત ખૂબ લાંબી છે. ક્લાયન્ટે સાક્ષીઓ સાથે દખલ કરવાની કોઈ કથિત ધમકીઓ રજૂ કરી નથી અને વર્ષોથી જેલમાં ફોન ઍક્સેસ હોવા છતાં આવી કોઈ પ્રવૃત્તિ થઈ નથી. મોદીની માનસિક સમસ્યાઓમાં હતાશા અને આત્મહત્યાના જોખમનો સમાવેશ થાય છે અને તે જેલવાસને કારણે વધુ બગડી હતી.’’
મોદી તરફે ડીફેન્સે કેનેડા અને યુ.એસ.માં બનેલી ઘટનાઓમાં કથિત ભારતીય ગુપ્ત એજન્ટની સંડોવણીના અહેવાલો જોતા દાવો કર્યો હતો કે મોદીએ રૉના એજન્ટોથી તેમના જીવન માટે જોખમનો સામનો કર્યો હતો અને તેઓ યુકેમાં સૌથી સુરક્ષિત હતા.
સેન્ટ્રલ બ્યુરો ઑફ ઇન્વેસ્ટિગેશન (CBI) અને એન્ફોર્સમેન્ટ ડિરેક્ટોરેટ (ED)ની સંયુક્ત ટીમ સુનાવણી માટે ભારતથી આવી હતી અને કોર્ટમાં કાર્યવાહીનું પાલન કર્યું હતું.
19 માર્ચ, 2019 ના રોજ પ્રત્યાર્પણ વોરંટ પર યુકેમાં તેની ધરપકડ કરવામાં આવી હતી, અને તે પછી યુકેના હોમ સેક્રેટરી પ્રિતિ પટેલે એપ્રિલ 2021 માં તેના પ્રત્યાર્પણનો આદેશ આપ્યો હતો. મોદીએ આ કેસમાં સુપ્રીમ કોર્ટ સુધીની તેમની કાનૂની અપીલો સમાપ્ત કરી દીધી છે અને છ અલગ-અલગ જામીન અરજીઓ કરી છે.
