શ્રીલંકાના ફાસ્ટ બોલર લસિથ મલિંગાએ ક્રિકેટના તમામ ફોર્મેટમાંથી નિવૃત્તિ લેવાની સોસિયલ મીડિયામાં જાહેરાત કરી હતી.નિવૃત્તિની જાહેરાત કરતાં મલિંગાએ કહ્યું કે આજનો દિવસ મારા માટે ખાસ છે. હું આપ સૌને આભાર વ્યક્ત કરવા ઇચ્છુ છું, જેમણે મારા ટી-20 કેરિયરમાં સાથ આપ્યો. આજે મેં ટી-20 કેરિયરની 100 ટકા આરામ આપવાનો નિર્ણય લીધો છે. હું શ્રીલંકા ક્રિકેટ બોર્ડ, મુંબઇ ઇન્ડિયન્સ, મેલબોર્ન સ્ટાર્સ, કેંટ ક્રિકેટ ક્લબ, રંગપુર રાઇડર્સ, ગુયાના વોરિયર્સ એમ સૌનો આભાર માનું છું. ક્રિકેટ માટે મારો પ્રેમ ક્યારેય ઓછો નહીં થાય. અમે અમારા યુવાઓને ઇતિહાસ રચતા જોવા માટે ઉત્સુક છીએ.
IPLમાં મુંબઇ ઇન્ડિયન્સ તરફથી રમનારા મલિંગાએ શ્રીલંકા માટે ક્રિકેટના ત્રણે ફોર્મેટમાં કુલ 546 વિકેટ લીધી છે. મલિંગાએ વર્ષ 2011માં ટેસ્ટ અને 2019માં વનડે ક્રિકેટમાંથી સંન્યાસ લેવાની જાહેરાત કરી હતી. એ પછી પણ મલિંગા શ્રીલંકા તરફથી ટી-20 આંતરરાષ્ટ્રી મેચ રમતા જોવા મળ્યા હતા.
શ્રીલંકાના ફાસ્ટ બોલર તરીકે આંતરરાષ્ટ્રીય ક્રિકેટ કારકિર્દી શરુ કરનારા મલિંગા વિશ્વના બેસ્ટ પેસરમાંથી એક માનવામાં આવતા હતા. પોતાના યોર્કર માટે જાણીતાં મલિંગાના સુકાનીપદમાં શ્રીલંકાએ 2014માં ટી-20 વર્લ્ડ કપ જીત્યો હતો. આ ટૂર્નામેન્ટની ફાઇનલ મેચ 6 એપ્રિલ 2014ના રોજ બાંગાલાદેશની રાજધાની ઢાકાના શેર એ બાંગ્લા સ્ટેડિયમ ખાતે રમાઇ હતી. ફાઇનલમાં મલિંગાની ટીમે ભારતીય ટીમને હરાવીને 2014 માટે ટી-20 વિશ્વ ચેમ્પિયન બન્યું હતું.
