લેસ્ટરમાં આવેલા જૈન સેન્ટર, શ્રી સનાતન મંદિર, શ્રી રામ મંદિર, શ્રીજીધામ હવેલી, હિન્દુ મંદિર, ગીતા ભવન મંદિર, BAPS સ્વામિનારાયણ મંદિર, વ્રજધામ હવેલી, સ્વામિનારાયણ મંદિર, જલારામ પ્રાર્થના મંદિર, શક્તિ મંદિર, રાધા કૃષ્ણ મંદિર, બ્રહ્મા કુમારીઝ, ગુજરાત હિન્દુ એસોસિએશન અને ઇસ્કોન લેસ્ટર દ્વારા જન સમુદાયને શાંતિ માટે અપીલ કરવામાં આવી છે.
આ સંસ્થાઓએ એક નિવેદનમાં જણાવ્યું હતું કે ‘’ઇસ્ટ લેસ્ટરમાં બનેલી કમનસીબ ઘટનાઓ સાંભળીને સમગ્ર લેસ્ટરના તમામ હિંદુ મંદિરો અને સમુદાય કેન્દ્રોનું સામૂહિક નેતૃત્વ ગભરાઈ ગયું છે. અમે બેલગ્રેવ અને નોર્થ એવિંગ્ટનની શેરીઓમાં અસંવેદનશીલ અને તદ્દન શરમજનક કૃત્યોની નિંદા કરીએ છીએ. આ સૌથી વધુ અસ્વીકાર્ય બાબત છે અને અમે શનિવારની રાતની ઘટનાઓ પાછળના કારણો અને ટ્રિગર્સને સમજવા અમે પોલીસ સાથે કામ કરી રહ્યા છીએ. અમે આશા રાખીએ છીએ કે જવાબદારોને ધ્યાનમાં લેવામાં આવશે અને આચરવામાં આવેલા ગુનાઓ માટે તમામ પગલાં લેવામાં આવશે.’’
નિવેદનમાં જણાવાયું હતું કે ‘’હિંદુ સમુદાયના આગેવાનો લેસ્ટર શહેરની અંદરના સંબંધો અને એકતાને નબળી પાડે તેવા આક્રમક કૃત્યોને સહન કરશે નહીં. જો કોઈ સંડોવાયેલ હોય અથવા આમાં પકડાયેલા અન્ય લોકોને જાણતા હોય તો કૃપા કરીને તેમને રોકો અને તરત જ પોલીસને તેની જાણ કરો. જો કોઈને સમર્થનની જરૂર હોય અથવા સલામત અને ગોપનીય રીતે કોઈપણ ચિંતા અંગે ચર્ચા કરવા માંગતા હોય, તો કૃપા કરીને પોલીસને 101 અથવા 999 પર કૉલ કરો.’’
‘’આપણે શાંતિ માટે એક થવું જોઈએ અને સંવાદ, ચર્ચા અને સાથે બેસીને યોગ્ય સમયે વાત કરાય તે જરૂરી છે.’’
