છેલ્લા ચાર દાયકામાં સૌથી વધુ ફુગાવો થઇ રહ્યો છે ત્યારે તેનો સામનો કરવા માટે, યુએસ અને યુરોઝોન બેન્કોની સાથે હવે યુકેની બેન્ક ઓફ ઇંગ્લેન્ડ પણ જોડાઇ છે અને બેન્કે જૂન 16ના રોજ 25 બેસિસ પોઈન્ટનો વધારો કરી વ્યાજનો દર 1.25% કર્યો છે. ગત ડિસેમ્બર પછી BoEનો આ પાંચમો વ્યાજ વધારો છે. જો કે તે વધારો અન્ય સેન્ટ્રલ બેંકોના તાજેતરના વધારા કરતાં નાનો છે. વધારાની જાહેરાત પછી સ્ટર્લિંગમાં ઘટાડો નોંધાયો હતો. BoE તીવ્ર આર્થિક મંદી આવવાની ચેતવણી હોવા છતાં પણ દરો વધારી રહ્યું છે.
ફુગાવો હવે ટોચના 11%ના સ્થાને છે. BoE એ એપ્રિલ-જૂન ક્વાર્ટરમાં બ્રિટનની અર્થવ્યવસ્થા સંકોચાઈ જશે તેવી ચેતવણી આપી છે. મોનેટરી પોલિસી કમિટીએ 1.25% સુધીના આ વ્યાજ વધારા માટે 6-3થી મત આપ્યો હતો. બ્રિટનનો બેન્ચમાર્ક દર હવે જાન્યુઆરી 2009 પછી સૌથી વધુ છે.
કોવિડ-19 રોગચાળાને પગલે નાણાકીય નીતિને કડક બનાવનારી પ્રથમ મુખ્ય સેન્ટ્રલ બેંક BoEએ જણાવ્યું હતું કે, “બેંક રેટમાં વધુ કોઈપણ વધારાનો સ્કેલ, ગતિ અને સમય સમિતિના આર્થિક દૃષ્ટિકોણ અને ફુગાવાના દબાણના મૂલ્યાંકનને પ્રતિબિંબિત કરશે. સમિતિ ખાસ કરીને વધુ સતત ફુગાવાના દબાણના સંકેતો પ્રત્યે સતર્ક રહેશે, અને જો જરૂરી હશે તો તેના જવાબમાં બળપૂર્વક કાર્ય કરશે.”
જેપી મોર્ગને જણાવ્યું હતું કે BoEએ મોટા દરમાં વધારાનો દરવાજો ખોલ્યો હતો. કન્ઝ્યુમર પ્રાઇસ ઇન્ફ્લેશન એપ્રિલમાં 40-વર્ષની ઊંચી સપાટી 9%એ પહોંચ્યો હતો, જે BoE ના 2%ના લક્ષ્ય કરતાં ચાર ગણા કરતાં વધુ હતો. બેંકે ગુરુવારે જણાવ્યું હતું કે એનર્જી બિલ ફરીથી વધશે ત્યારે ઓક્ટોબરમાં 11%થી સહેજ ઉપર જશે. બ્રિટનનો ફુગાવાનો ઉછાળો અન્ય ઘણી અર્થવ્યવસ્થાઓની સરખામણીમાં લાંબો સમય ચાલશે તેવું લાગે છે.
આગાહી છે કે બ્રિટનની અર્થવ્યવસ્થા એપ્રિલ-જૂનમાં 0.3% ઘટશે. યુરો સામે ડૉલરનું મૂલ્ય વધી રહ્યું છે કારણ કે યુએસ ફેડરલ રિઝર્વે પહેલેથી જ વ્યાજદરમાં વધારો કરવાનું શરૂ કરી દીધું છે, જ્યારે યુરોપિયન સેન્ટ્રલ બેંક જુલાઈમાં આવું કરવાનું શરૂ કરશે.
