ઇન્ફોસિસના સહ-સ્થાપક નંદન નીલેકણીએ દેશની પ્રતિષ્ઠિત એજ્યુકેશન એન્ડ રિસર્ચ ઇન્સ્ટીટ્યૂટ ઇન્ડિયન ઇન્સ્ટિટ્યૂટ ઓફ ટેક્નોલોજી (IIT) બોમ્બેને ₹315 કરોડનું દાન આપ્યું છે. નિલેકણી 1973માં ઇલેક્ટ્રિકલ એન્જિનિયરિંગમાં સ્નાતકની ડિગ્રી હાંસલ કરવા માટે આ શિક્ષણ સંસ્થામાં જોડાયા હતા અને આ જોડાણના 50 વર્ષ પૂરા થવાના પ્રસંગે તેમણે આ દાન આપ્યું છે.
એક રીલીઝમાં જણાવાયું હતું કે આઇઆઇટી, બોમ્બેમાં દાનનો હેતુ વિશ્વ-કક્ષાના ઈન્ફ્રાસ્ટ્રક્ચરની સ્થાપન કરવાનો, એન્જિનિયરિંગ અને ટેક્નોલોજીના ઉભરતા ક્ષેત્રોમાં સંશોધનને પ્રોત્સાહન આપવાનો તથા ટેક સ્ટાર્ટઅપ ઈકોસિસ્ટમને પોષવાનો છે. આ યોગદાન ભારતમાં ભૂતપૂર્વ વિદ્યાર્થી દ્વારા કરવામાં આવેલા સૌથી મોટા દાનમાંનું એક છે.
નીલેકણીએ જણાવ્યું હતું કે IIT-Bombay મારા જીવનનો એક પાયાનો પથ્થર છે, જેને મારા રચનાત્મક વર્ષોને આકાર આપ્યો છે અને મારી યાત્રાનો પાયો નાંખ્યો છે. આ પ્રતિષ્ઠિત સંસ્થા સાથેના મારા જોડાણના 50 વર્ષની ઉજવણી કરતી વખતે ભવિષ્ય માટે યોગદાન આપવા બદલ આભારી છું. આ દાન માત્ર એક નાણાકીય યોગદાન કરતાં વિશેષ છે. આ સંસ્થાઓ મને ઘણુ આપ્યું છે. આ દાન વિદ્યાર્થીઓ માટેની પ્રતિબદ્ધતા છે જે આવતીકાલે આપણી દુનિયાને આકાર આપશે.
નીલેકણી અને IIT બોમ્બેના ડાયરેક્ટર પ્રોફેસર સુભાસીસ ચૌધરીએ બેંગલુરુમાં મેમોરેન્ડમ ઓફ અન્ડરસ્ટેન્ડિંગ પર હસ્તાક્ષર કર્યા હતા. ચૌધરીને જણાવ્યું હતું કે ઐતિહાસિક દાન IIT બોમ્બેને વૈશ્વિક નેતૃત્વના માર્ગ પર સ્થાપિત કરશે. નીલેકણીએ આ સંસ્થાને અગાઉ ₹85 કરોડનું દાન આપ્યું હતું, જેનાથી તેમનું કુલ યોગદાન ₹400 કરોડ થઈ ગયું હતું.
