યુક્રેન પર રશિયાના આક્રમણને પગલે એનર્જીના વધતાં જતાં ભાવ વચ્ચે યુરોપમાં મોંઘવારીએ માઝા મૂકી છે. યુરોઝોનના 19 દેશોમાં મે મહિનામાં ફુગાવો વધી 8.1 ટકાના રેકોર્ડ સ્તરે પહોંચ્યો હતો, જે 1997 પછીના સૌથી ઊંચા સ્તરે છે, એમ સત્તાવાળાએ ગુરુવારે જણાવ્યું હતું.
યુરોઝોનો વાર્ષિક ફુગાવાએ માર્ચ અને એપ્રિલના અગાઉના 7.4 ટકાના રેકોર્ડ પણ તોડી નાંખ્યો છે. યુરોપિયન યુનિયન સ્ટેટેસ્ટિક્સ એજન્સી યુરોસ્ટેટના તાજેતરના ડેટા અસાર એનર્જીના ભાવમાં 39.2 ટકાનો જંગી ઉછાળો આવ્યો છે, જે દર્શાવે છે કે યુક્રેન યુદ્ધ અને તેના પરિણામે સર્જાયેલી વૈશ્વિક ઊર્જા કટોકટીને કારણે યુરોપના 34.4 કરોડ લોકો માટે જીવન વધુને વધુ મોંઘું બની રહ્યું છે. યુરોપમાં ફુગાવાનું આ સ્તરે 1997 પછીના સૌથી ઊંચા સ્તરે છે.
ફુગાવાના આ આંકડા વધતી જતી મોંઘવારી પર કાબુ મેળવવા માટે વ્યાજદરમાં વધારો કરવાના યુરોપિયન સેન્ટ્રલ બેન્ક પર દબાણ પણ વધ્યું છે. યુરોપના દેશોમાં વ્યાજદરો હાલમાં ખૂબ જ નીચા સ્તરે છે. યુરોસ્ટેટના જણાવ્યા અનુસાર ખાદ્યચીજવસ્તુઓના ભાવમાં પણ 7.5 ટકાનો વધારો જોવા મળ્યો છે. યુદ્ધથી વિશ્વભરમાં ખાદ્યચીજવસ્તુઓના ભાવમાં કેટલો મોટો વધારો થઈ રહ્યો છે તેનું તે વધુ એક ઉદાહરણ છે. રશિયા અને યુક્રેન વિશ્વમાં અગ્રણી ફૂડ સપ્લાયર દેશો છે. પરંતુ આ બંને દેશો વચ્ચેના યુદ્ધને કારણે સપ્લાય ચેઇન ખોરવાઈ ગઈ છે. યુરોપના દેશોમાં કપડા, એપ્લાયન્સિસ, કાર, કમ્પ્યૂટર્સ અને બુક્સ જેવી ચીજવસ્તુઓના ભાવમાં પણ 4.2 ટકાનો ઉછાળો આવ્યો છે. સર્વિસિસ માટેના ભાવમાં 3.5 ટકાનો વધારો થયો છે.
