અમેરિકામાં સંતાનો સાથે રહેતા ભારતીયોને ઇમિગ્રેશન પોલિસી મેન્યુઅલના નવા ફેરફારનો લાભ મળશે

અમેરિકામાં બાઇડેન એડમિનિસ્ટ્રેશને ચાઇલ્ડ સ્ટેટસ પ્રોટેક્શન એક્ટ (CSPA) હેઠળ કેટલાક સંજોગોમાં બિનનાગરિકોની ઉંમરની ગણતરી કરવાના હેતુથી નીતિમાં ફેરફાર કરવાની જાહેરાત કરી છે. આ જાહેરાતને 21 વર્ષથી મોટા સંતાનોની મુશ્કેલીઓને દૂર કરવા માટે નાના પરંતુ એક મહત્વપૂર્ણ પગલા તરીકે જોવામાં આવે છે, જેમાં ભારતીયોની સંખ્યા ઘણી મોટી છે, અને તેઓ તેમના માતા-પિતા સાથે નાનપણમાં કાયદેસર રીતે અમેરિકા આવ્યા હતા.

પરિવાર દ્વારા સ્પોન્સર અથવા રોજગાર આધારિત વિઝા માટે તેમના માતાપિતાની મંજૂર અરજીના આધારે સંતાન માટે અમેરિકામાં કાયદેસર કાયમી રહેવાસીનો દરજ્જો મેળવવા માટે, સામાન્ય રીતે તે 21 વર્ષથી ઓછી ઉંમરનું હોવું ફરજિયાત છે. જો સંતાન 21 વર્ષનું થાય અને “ઉમર વધી જાય” તો ઇમિગ્રેશન પ્રક્રિયા દરમિયાન, સંતાન સામાન્ય રીતે માતા-પિતાની અરજીના આધારે તેમની સાથે સ્થળાંતર કરવા માટે લાયક નથી.

improvethedream.orgના દીપ પટેલે જણાવ્યું હતું કે, “યુએસ સિટિઝનશિપ એન્ડ ઇમિગ્રેશન સર્વિસીઝ (USCIS) દ્વારા અમારી લાંબા સમયથી થયેલી વિનંતી મુજબ એક નીતિમાં સત્તાવાર ફેરફાર કરવામાં આવ્યો છે. USCIS ફાઇલિંગ ચાર્ટ માટેની તારીખોનો ઉપયોગ CSPA મુજબ ઉંમર નિર્ધારિત કરવા માટે કરશે અને અગાઉ નામંજૂર થયેલી કોઈપણ અરજી ફરીથી ધ્યાનમાં લઇ શકાશે.” improvethedream.org આવા બે લાખથી વધુ મોટી ઉંમરના સંતાનો માટે આ પ્રકારના પ્રયાસનું નેતૃત્વ કરી રહ્યું છે.

ફેડરલ એજન્સીએ જણાવ્યું હતું કે, આ નવી માર્ગદર્શિકા મુજબ, USCIS હવે CSPAના હેતુઓ માટે આવા બિનનાગરિકોની ઉંમરની ગણતરી કરવા માટે ફાઇલિંગ ચાર્ટ માટેની તારીખોનો ઉપયોગ કરશે, જે આ બિનનાગરિકોને તેમના દરજ્જાને વ્યવસ્થિત કરવાની તેમની લાયકાત અંગે વધુ નિશ્ચિત કરે છે.

કોંગ્રેસે કેટલાક બિનનાગરિક સંતાનોને મંજૂર વિઝા પિટિશનના આધારે કાયદેસર કાયમી રહેવાસીનો દરજ્જો મેળવવાની પાત્રતા ગુમાવવાથી બચાવવા માટે CSPA ઘડ્યો હતો, જેમાં સંતાનની ઉંમરની ગણતરી કરવાની પદ્ધતિ રજૂ કરીને ઇમિગ્રન્ટ વિઝા નંબર “ઉપલબ્ધ થાય છે”.

વિઝા નંબર ક્યારે ઉપલબ્ધ થાય છે તે નિશ્ચિત કરવા માટે ડીપાર્ટમેન્ટ ઓફ સ્ટેટના વિઝા બુલેટિનનો ઉપયોગ કરવામાં આવે છે. આ વિઝા બુલેટિનમાં બે ચાર્ટ- ફાઇલિંગ ચાર્ટ માટેની તારીખો અને ફાઇનલ એક્શનની તારીખના ચાર્ટ હોય છે. અગાઉના CSPA માર્ગદર્શન અંતર્ગત, USCIS એ CSPA ઉંમરની ગણતરીના હેતુઓ માટે ઉપલબ્ધ વિઝાને માત્ર ફાઇનલ એક્શન ડેટ ચાર્ટના આધારે ધ્યાનમાં લેવામાં આવે છે, પછી ભલે કોઈપણ બિનનાગરિક “ડેટ્સ ફોર ફાઈલિંગ”ના ચાર્ટમાં અગાઉની તારીખનો ઉપયોગ કરીને દરજ્જામાં ફેરફાર માટે અરજી કરી શકે.

આ USCISની નીતિમાં ફેરફાર તાત્કાલિક અસરથી જ અમલમાં આવ્યા છે અને પડતર અરજીઓ પર પણ તે લાગુ પડે છે. તેથી, જેમની અરજી પડતર છે તેવા કેટલાક બિનનાગરિકોની CSPA ઉંમર હોય શકે છે, જે હવે આ ફેરફારના આધારે 21 વર્ષથી ઓછી છે.

ઉદાહરણ તરીકે, ઓક્ટોબર અને ડિસેમ્બર 2020ની વચ્ચે, કેટલાક બિનનાગરિકોને વિઝા બુલેટિનના ફાઇલિંગ ચાર્ટની તારીખો અંતર્ગત સ્ટેટસ એપ્લિકેશનનું એડજસ્ટમેન્ટ ફાઇલ કરવાની મંજૂરી આપવામાં આવી હતી. જોકે, ફાઇનલ એક્શન ડેટ ચાર્ટમાં તેમની અરજીઓ મંજૂર કરવા માટે યોગ્ય કાર્યવાહી આગળ વધી નથી. આ બિનનાગરિકોએ CSPAથી તેમને લાભ થશે કે કેમ તે જાણ્યા વગર જરૂરી ફી ભરીને સ્ટેટસ એપ્લિકેશન એડજસ્ટમેન્ટ અરજી કરી છે.
જો આ બિનનાગરિકો નીતિમાં ફેરફારને કારણે તેમના દરજ્જામાં ફેરફાર કરવા માટે યોગ્યતા ધરાવે છે અને તેમણે દરજ્જામાં ફેરફાર માટે અરજી કરી છે, તો તેઓ તેમની પડતર સ્ટેટસ એપ્લિકેશન એડજસ્ટમેન્ટ અરજીના આધારે રોજગાર અને મુસાફરીની મંજૂરી મેળવવા માટે અરજી કરી શકશે અને તેઓ અગાઉ ઇસ્યુ કરવામાં આવેલ રોજગાર અથવા મુસાફરીની મંજૂરીને સામાન્યરીતે ગુમાવશે નહીં.

USCIS એ જણાવ્યું હતું કે આ પોલિસી મેન્યુઅલના નવા ફેરફાર તમામ સંતાનોને ઇમિગ્રન્ટ વિઝા 21 વર્ષની ઉંમર થાય ત્યારે તેમના માતાપિતા પાસેથી મેળવેલ નોનઇમિગ્રન્ટ સ્ટેટસ ગુમાવતા અટકાવશે નહીં. ફેડરલ એજન્સીએ જણાવ્યું હતું કે, “USCIS આ લોકોને મદદ કરવા કાયદા અંતર્ગત ઉપલબ્ધ તમામ વિકલ્પો શોધવાનું જાળવી રાખશે.”
દીપ પટેલે વધુમાં જણાવ્યું હતું કે, “આ કામ થોડા વહીવટી ફેરફારો પૈકીનું એક છે, જે એડમિનિસ્ટ્રેશન માટે સરળ કાર્ય હતું, પરંતુ તેને અહીં સુધી પહોંચવામાં લાંબો સમય થયો છે, પણ તે જોઈને ખૂબ ખુશી થાય છે. “CSPA અંતર્ગત ઉંમરની ગણતરી કેવી રીતે કરવામાં આવે છે તેનું અર્થઘટન કરવા માટે તેને પોલીસી મેન્યુઅલમાં ફેરફાર તરીકે ધ્યાનમાં લેવામાં આવે છે. મારું એવું અનુમાન છે કે જેમની ઉંમર અગાઉ વધી ગઇ છે તેમનાથી ઓછામાં ઓછા થોડા હજાર સંતાનોને લાભ થશે. પરંતુ સંભાવના છે કે, ભવિષ્યના વર્ષો માટે બીજા કેટલાક હજારોને સુરક્ષિત કરવામાં આવશે.”

અમેરિકાને પોતાનું ઘર માનનારા કાયદેસરના બે લાખ જેટલા લોકોને સુરક્ષિત કરવા બદલ USCISની કાર્યવાહીને યુએસ કોંગ્રેસવુમન દેબોરાહ રોસે બિરદાવી હતી.
રોસે જણાવ્યું હતું કે, “આ એક મહત્વપૂર્ણ પગલું છે, જે દરરોજ આપણા દેશ અને અર્થવ્યવસ્થામાં યોગદાન આપતી ઘણી વ્યક્તિઓને સુરક્ષિત કરશે, પરંતુ આપણે અહીં અટકાવી શકીએ નહીં. આ પ્રેરણાદાયી યુવાનો માટે નાગરિકતા અને અંતે તેઓ જેને લાયક છે તે આપવા માટે આપણે મારો દ્વિપક્ષીય અમેરિકાનો ચિલ્ડ્રન એક્ટ પસાર કરવો જોઈએ. હું તેના ઉકેલ માટે લડત આપવાનું બંધ નહીં કરું.”

117મી કોંગ્રેસમાં, ડોક્યુમેન્ટેડ ડ્રીમર્સને સુરક્ષિત રાખવાના પ્રયાસોમાં રોસે તેમના હાઉસ અને સેનેટ સાથીઓની આગેવાની લીધી હતી. તેમણે ડોક્યુમેન્ટેડ ડ્રીમર્સને કાયમી નિવાસીનો દરજ્જો આપવા માટે દ્વિપક્ષીય, બે ગૃહોવાળા અમેરિકાનો ચિલ્ડ્રન એક્ટ રજૂ કર્યો. ડોક્યુમેન્ટેડ ડ્રીમર્સને સીસ્ટમમાંથી ઉંમરનો બાધ અટકાવવા માટેનો તેમનો સુધારો જુલાઈ 2022માં નેશનલ ડીફેન્સ ઓથોરાઈઝેશન એક્ટના ભાગરૂપે હાઉસ ઓફ રીપ્રેઝન્ટેટિવ્ઝે પસાર કર્યો હતો.

અત્રે ઉલ્લેખનીય છે કે, આ અંગે AAPIsના પ્રેસિડેન્ટસ એડવાઇઝરી કમિશને (PAC-AAPI) તેની અગાઉની બેઠકોમાં પણ આવી ભલામણો કરી હતી. પોતાની ભલામણોમાં, કમિશને જણાવ્યું હતું કે USCISએ આ ઉંમરના સંતાનોને તેમના માતાપિતાની ગ્રીન કાર્ડની અરજીની પ્રાથમિકતા તારીખ જાળવી રાખવાની મંજૂરી આપવી જોઈએ.
આ ઉપરાંત માતા-પિતાની વિઝા અરજીની પ્રાથમિકતાની તારીખનો ઉપયોગ કરીને આવા સંતાનોને પોતાના ગ્રીનકાર્ડ માટે અરજી માટે મંજૂરી આપવી જોઇએ, જે તેમના માતા-પિતાના એમ્પ્લોયર દ્વારા કરવામાં આવી હતી.

કમિશને ભલામણ કરી છે કે USCIS એ વિઝા અરજી કર્યાની તારીખના આધારે આશ્રિતોની ચાઇલ્ડ સ્ટેટસ પ્રોટેક્શન એક્ટ (CSPA) અંતર્ગત અરજીની તારીખની ગણતરી કરવા માટે તેના પોલીસી મેન્યુઅલમાં સુધારો કરવો જોઈએ.

અમેરિકામાં બે લાખથી વધુ “ડોક્યુમેન્ટેડ ડ્રીમર્સ” છે, જેમાંથી મોટાભાગના ભારતમાંથી આવ્યા છે, જોકે તેઓ વિશ્વના કોઈપણ દેશમાંથી આવી શકે છે. આ એ યુવાનો છે જે પોતાના માતા-પિતાના હંગામી, રોજગાર આધારિત નોન-ઇમિગ્રન્ટ વિઝા પર નિર્ભર હોવાના કારણે તેમને મળેલી હંગામી મંજૂરીમાંથી બહાર નીકળી ગયા છે અથવા નીકળી જશે.

આવું એટલા માટે બને છે કારણ કે મોટાભાગના બિનનાગરિકો કે જેઓ હંગામી વર્ક વિઝા પર અમેરિકામાં આવે છે તેમની પાસે કાયમી કાયદાકીય દરજ્જા અંગેની માર્ગદર્શિકા સ્પષ્ટ નથી, જો તેમના સગીર બાળકો પણ આશ્રિત તરીકે તેમની સાથે આવે છે, તો તેમને પણ આવી આંટીઘુંટીનો સામનો કરવો પડે છે. 21 વર્ષના થયા પછી, તેમણે તેમના માતા-પિતાના વિઝા દ્વારા મેળવેલા તેમનો હંગામી કાયદાકીય દરજ્જો પણ પૂર્ણ થઇ જશે. આ સમયે, તેમણે અમેરિકા છોડવું જોઈએ અથવા સંભવિત દેશનિકાલનો સામનો કરવો જોઈએ. જો તેઓ પોતાનો અલગ હંગામી અથવા કાયમી દરજ્જો મેળવી શકે છે વાત જુદી છે. કારણ કે તેઓ 21 વર્ષના થાય ત્યાં સુધી કાયદેસરની સ્થિતિ જાળવી રાખે છે, ડોક્યુમેન્ટેડ ડ્રીમર્સને ડીફર્ડ એક્શન ફોર ચાઈલ્ડહૂડ અરાઈવલ્સ (DACA) પ્રોગ્રામ હેઠળ મળેલ હંગામી દેશનિકાલ સુરક્ષા અને વર્ક ઓથોરાઇઝેશન માટે ગેરલાયક માનવામાં આવે છે, જેના માટે આ વિઝા મેળવનારને 15 જૂન, 2012ના રોજ “કોઈ કાયદેસર દરજ્જો” ન હોવો જરૂરી છે.

અધિકૃત આંકડા અનુસાર, એપ્રિલ 2020માં, અંદાજે 253,293 સંતાનો તેમના માતાપિતાની રોજગાર-આધારિત ઇમિગ્રન્ટ વિઝા અરજીઓ પર નિર્ભર રહીને કાયમી નિવાસની મંજૂરી મેળવવાની રાહ જોઈ રહ્યા હતા અને તેમની સામે ઉંમર વધવાનું જોખમ પણ હતું.

અમેરિકામાં રહેવા માટે કાયદાકીય દરજ્જા વગર જે સંતાનોની ઉંમર વધી ગઈ છે તેમણે નવા હંગામી વિઝા (દા.ત સ્ટુડન્ટ વિઝા ક્લાસિફિકેશન), પોતાની રીતે દેશનિકાલ કરવાનો પ્રયાસ કરવો જોઈએ અથવા ગેરકાયદે બની જવું જોઈએ અને તેમના પર કાર્યવાહી થવાનું જોખમ હોય છે.

જે વિદેશીઓ હંગામી દરજ્જો મેળવી શકે છે, તેઓ ઘણીવાર કાયમી નિવાસની મંજૂરી પણે મેળવી લે છે, સિવાય કે જ્યાં સુધી તેઓ કોલેજનો અભ્યાસ પૂર્ણ કરે, અથવા હંગામી રોજગાર માટે ગેરલાયક ઠરે (જેમ કે, H-1B વિઝા માટે સ્પોન્સર થવું) અને પછી ઈમિગ્રન્ટ વિઝા માટે સ્પોન્સર થઈ શકે અને પછી પાછળથી ફરીથી ગ્રીનકાર્ડ મેળવવાની લાઇનમાં જોડાય છે.