ઈન્ટરનેટ બંધ થવાના મામલે ભારત વિશ્વમાં સતત પાંચમા વર્ષે ટોચ પર રહ્યું હતું. ગયા વર્ષે, વિશ્વભરમાં 187 ઇન્ટરનેટ શટડાઉનમાંથી, 84 ભારતમાં થયાં હતાં. આ યાદીમાં યુક્રેન બીજા નંબરે હતું.
24 ફેબ્રુઆરી, 2022ના રોજ, રશિયા દ્વારા યુદ્ધ કરવામાં આવ્યા પછી, રશિયન સેનાએ યુક્રેનમાં લગભગ 22 વખત ઇન્ટરનેટ કનેક્શન કાપી નાખ્યું હતું. આ યાદીમાં ઈરાન ત્રીજા નંબરે છે જ્યાં 2022માં સરકારે 18 વખત ઈન્ટરનેટ શટડાઉન કર્યું હતું. ભારતમાં સૌથી વધુ 49 ઈન્ટરનેટ શટડાઉન જમ્મુ અને કાશ્મીરમાં નોંધાયા હતા. ન્યૂયોર્ક સ્થિત ડિજિટલ રાઈટ્સ એડવોકેસી ગ્રૂપ, એક્સેસ નાઉ દ્વારા મંગળવારે આ રિપોર્ટ બહાર પાડવામાં આવ્યો હતો. રિપોર્ટ અનુસાર, વિરોધ પ્રદર્શન, પરીક્ષાઓ અને ચૂંટણી સહિત અન્ય ઘણા કારણોસર ભારત સરકારે ઈન્ટરનેટ બંધ કરવાના આદેશ જારી કર્યા હતા. રિપોર્ટમાં જણાવવામાં આવ્યું છે કે વર્ષ 2016થી વિશ્વભરમાં ઈન્ટરનેટ બંધ થવાના કુલ કિસ્સામાંથી લગભગ 58 ટકા એકલા ભારતમાં જ થયા હતા. ગત વર્ષ 2022માં વિશ્વભરમાં ઇન્ટરનેટ બંધ થવાના કુલ 187 કેસ નોંધાયા હતા. તેમાંથી 84 કેસ ભારતમાં નોંધાયા છે.
રિપોર્ટ અનુસાર, વર્ષ 2022માં ભારતમાં કેન્દ્રશાસિત પ્રદેશ જમ્મુ અને કાશ્મીરમાં સૌથી વધુ 49 ઈન્ટરનેટ બંધ થયા હતા. જમ્મુ અને કાશ્મીરમાં વર્ષ 2022માં જાન્યુઆરીથી ફેબ્રુઆરી વચ્ચે અથવા બે મહિનામાં એક પછી એક 16 વખત ઈન્ટરનેટ બંધ કરવામાં આવ્યું હતું. અને રાજસ્થાનમાં અલગ-અલગ પ્રસંગોએ 12 વખત ઈન્ટરનેટ બંધ કરવામાં આવ્યું હતું. પશ્ચિમ બંગાળમાં 7 વખત ઈન્ટરનેટ બંધ કરવાનો આદેશ આપવામાં આવ્યો હતો. વર્ષ 2021માં, ખેડૂત આંદોલન દરમિયાન, રાષ્ટ્રીય રાજધાની નવી દિલ્હીમાં લાંબા સમય સુધી ઇન્ટરનેટ બંધ રહ્યું હતું. તે વર્ષે, વિશ્વભરમાં કુલ 30,000 કલાક માટે ઇન્ટરનેટ બંધ કરવામાં આવ્યું હતું. તેના કારણે 5.45 અબજ ડોલર એટલે કે લગભગ 40,300 કરોડ રૂપિયાનું નુકસાન થયું હતું.
