ભારત અને ઇંગ્લેન્ડ વચ્ચેની પાંચમી ટેસ્ટ મેચમાં સોમવારે ચોથા દિવસે ભારતે ઇંગ્લેન્ડને જીતવા માટે 378 રનો લક્ષ્યાંક આપ્યો હતો. જસપ્રિત બુમરાહની આગેવાનીવાળી ભારતીય ટીમ બીજા દાવમાં ચોથા દિવસે બીજું સત્ર પૂરું થાય તે પહેલા 245 રનમાં ઓલ-આઉટ થઈ હતી. પ્રથમ દાવની સરસાઈના આધારે ભારતે યજમાન ટીમ સામે 378 રનનો લક્ષ્યાંક મૂક્યો હતો. બીજા દાવમાં ભારત માટે ચેતેશ્વર પૂજારાએ સૌથી વધુ 66 રન નોંધાવ્યા હતા, જ્યારે પ્રથમ દાવમાં આક્રમક સદી નોંધાવનારા રિશભ પંતે 57 રનનું યોગદાન આપ્યું હતું. અગાઉ ભારતે પ્રથમ દાવમાં 416 રન નોંધાવ્યા હતા અને ઈંગ્લેન્ડનો પ્રથમ દાવ 284 રનમાં સમેટી લીધો હતો.
ભારતીય ટીમે પ્રથમ દાવમાં 416 રન ખડક્યા હતા પરંતુ તેની તુલનામાં બીજા દાવમાં તેનું બેટિંગ પ્રદર્શન નિરાશાજનક રહ્યું હતું. તેમાં વિરાટ કોહલી વધુ એક વખત ફ્લોપ રહ્યો હતો. ભારતે રવિવારે મેચના ત્રીજા દિવસે ઈંગ્લેન્ડને 284 રનમાં ઓલ-આઉટ કરી દીધું હતું. જોકે, બીજા દાવમાં ભારતની શરૂઆત ખરાબ રહી હતી. રવિવારે ત્રીજા દિવસની રમત પૂરી થઈ ત્યારે ભારતે ત્રણ વિકેટે 125 રન નોંધાવ્યા હતા. ભારતે ઓપનર શુભમન ગિલ, હનુમા વિહારી અને વિરાટ કોહલીની વિકેટ ગુમાવી દીધી હતી. ચેતેશ્વર પૂજારા 50 અને રિશભ પંત 30 રને રમતમાં હતા. શુભમન ગિલ ચાર, વિહારી 11 અને કોહલીએ 20 રન નોંધાવ્યા હતા.
પૂજારા અને પંતે બાજી સંભાળી હતી અને શાનદાર બેટિંગ પ્રદર્શન કર્યું હતું. સોમવારે ચોથા દિવસે ભારતે પૂજારાના રૂપમાં પોતાની પ્રથમ વિકેટ ગુમાવી હતી. પૂજારાએ 168 બોલનો સામનો કરતાં આઠ ચોગ્ગાની મદદથી 66 રન ફટકાર્યા હતા. રિશભ પંતે પણ અડધી સદી ફટકારી હતી. તેણે 86 બોલમાં 57 રન ફટકાર્યા હતા, જેમાં આઠ ચોગ્ગા સામેલ હતા. પૂજારા અને પંત આઉટ થયા બાદ ભારતીય લોઅર ઓર્ડરના બેટર્સ વધારે સમય ટકી શક્યા ન હતા. બેન સ્ટોક્સે ભારતીય ઓલર ઓર્ડરને ઝડપથી સમેટી લીધો હતો.રેયસ ઐય્યર બીજા દાવમાં પણ મોટી ઈનિંગ્સ રમી શક્યો ન હતો. તે 19 રન નોંધાવીને આઉટ થયો હતો જ્યારે શાર્દૂલ ઠાકુર ચાર રન નોંધાવીને પેવેલિયન ભેગો થયો હતો. રવિન્દ્ર જાડેજાએ 23 રનું યોગદાન આપ્યું હતું. જ્યારે મોહમ્મદ શમીએ 13 અને જસપ્રિત બુમરાહે સાત રનનું યોગદાન આપ્યું હતું. મોહમ્મદ સિરાજ બે રન નોંધાવીને નોટ-આઉટ રહ્યો હતો. ઈંગ્લેન્ડ માટે સુકાની બેન સ્ટોક્સે સૌથી વધુ ચાર વિકેટ ઝડપી હતી. જ્યારે સ્ટુઅર્ટ બ્રોડ અને મેથ્યુ પોટ્સને બે-બે સફળતા મળી હતી. જેમ્સ એન્ડરસન અને જેક લીચના ખાતામાં એક-એક વિકેટ આવી હતી
