વિદેશમાં ભણવાનો ટ્રેન્ડ વધી રહ્યો છે ત્યારે મોદી સરકારે એક મહત્ત્વની હિલચાલ કરી છે. સરકારે વિદેશી યુનિવર્સિટીને ભારતમાં કેમ્પસ ખોલવાની ગુરુવાર, 5 જાન્યુઆરીએ મંજૂરી આપી હતી. યુજીસીએ ભારતમાં વિદેશી ઉચ્ચ શિક્ષણ સંસ્થાઓ માટે કેમ્પસ સ્થાપવા તેમજ તેના સંચાલન માટે સૂચિત નિયમો જાહેર કર્યા છે. આખરી નિયમો મહિનાના અંત સુધીમાં નોટિફાય કરવામાં આવશે. તમામ પક્ષકારોના અભિપ્રાય પછી આખરી નિયમો ઘડવા વિચારણા કરાશે.
યુનિવર્સિટી ગ્રાન્ટ કમિશન (યુજીસી)ના ચેરપર્સને એમ જગદીશ કુમારે જણાવ્યું હતું કે હાલમાં ભારતમાં કેમ્પસ સાથેની વિદેશી યુનિવર્સિટી માત્ર ઓફલાઇન ફુલ-ટાઇમ પ્રોગ્રામ ઓફર કરી શકે છે. તેમને ઓનલાઇન કે ડિસ્ટન્સ લર્નિંગના કોર્સનું સંચાલન કરવાની મંજૂરી છે. વિદેશી યુનિવર્સિટી અને ઉચ્ચ શિક્ષણ સંસ્થાઓ ભારતમાં કેમ્પસ સ્થાપવા યુજીસીની મંજૂરીની જરૂર પડશે. વિદેશી યુનિવર્સિટીને પ્રારંભિક તબક્કે ૧૦ વર્ષની મંજૂરી મળશે. ચોક્કસ શરતોનું પાલન થશે તો નવમા વર્ષે આ મંજૂરી રિન્યૂ કરવામાં આવશે.
સરકારે આ માટે કેટલાંક નિયમો બનાાવ્યા છે. વિદેશી યુનિવર્સિટી રાષ્ટ્રીય હિતને નુકસાન પહોંચાડે તેવા તેમજ ઉચ્ચ શિક્ષણના ધોરણોને અસર કરે તેવા અભ્યાસક્રમ ચલાવી નહીં શકે.
વિદેશી યુનિવર્સિટીને પ્રવેશના માપદંડ અને ફીના માળખાનો નિર્ણય લેવાની સ્વતંત્રતા હશે. જોકે, કમિશને ફી વાજબી અને તેની પ્રક્રિયા પારદર્શક રાખવાની સલાહ આપી છે. જગદીશ કુમારે જણાવ્યું હતું કે, “વિશ્વમાં ઊંચું રેટિંગ ધરાવતી યુનિવર્સિટીઝને ભારતમાં પ્રવેશની મંજૂરીથી ઉચ્ચ શિક્ષણને આંતરરાષ્ટ્રીય દ્રષ્ટિકોણ મળશે. તેને લીધે ભારતીય વિદ્યાર્થીઓ વાજબી ખર્ચે વિદેશી ડિગ્રી મેળવી શકશે અને ભારત આકર્ષક ‘ગ્લોબલ સ્ટડી’ માટેનું આકર્ષક સ્થળ બનશે.” તેમણે વધુમાં જણાવ્યું હતું કે, “વિદેશી ભંડોળની આપ-લે ફોરેન એક્સ્ચેન્જ મેનેજમેન્ટ એક્ટ મુજબ કરવાની રહેશે. વિદેશી યુનવર્સિટીએ વાર્ષિક ધોરણે ઓડિટ રિપોર્ટ સુપરત કરવાનો રહેશે.”વિદેશી શૈક્ષણિક સંસ્થાઓની બે કેટેગરી ભારતમાં કેમ્પસ માટે અરજી કરી શકશે. એકંદરે અથવા વિષયની બાબતમાં ટોપ-૫૦૦માં સ્થાન ધરાવનારી યુનિવર્સિટી અરજી કરી શકશે.
