દિલ્હીના જહાંગીરપુરી વિસ્તારમાં શનિવારે હનુમાન જયંતિ પર નીકળેલી શોભાયાત્રા પર પથ્થરમારાને પગલે હિંસા ફાટી નીકળી હતી. બે જૂથ વચ્ચેની અથડામણ અને આગચંપીને કારણે આઠ પોલીસ જવાનો અને એક સ્થાનિક નાગરિક ઘાયલ થયા હતા. કેટલાક વાહનોને પણ આગ ચાંપી દેવામાં આવી હતી. 18 એપ્રિલે પણ જહાંગીરપુરીમાં તપાસ કરવા ગયેલી દિલ્હી પોલીસ પર ફરી પથ્થરમારો થયો હતો.
ડીસીપી નોર્થ-વેસ્ટ ઉષા રંગનાનીએ જણાવ્યું કે જહાંગીરપુરી હિંસા કેસમાં 20 આરોપીઓની ધરપકડ કરવામાં આવી છે અને કાયદાનું ઉલ્લંઘન કરનારા 2 કિશોરોની પણ ધરપકડ કરવામાં આવી છે. આરોપીઓના કબજામાંથી 3 પિસ્તોલ અને 5 તલવાર મળી આવી છે. આ મામલે વધુ તપાસ ચાલી રહી છે.
હિંસાના કેસમાં 21 વર્ષીય યુવક સહિત બે લોકોને દિલ્હીની કોર્ટમાં એક દિવસની પોલીસ કસ્ટડીમાં મોકલવામાં આવ્યા હતા. આ બંને પર પોલીસ સબ ઈન્સ્પેક્ટરને ગોળી મારવાનો આરોપ છે. ડ્યુટી મેજિસ્ટ્રેટ દિવ્યા મલ્હોત્રાએ મોહમ્મદ અસલમ અને અન્ય આરોપી મોહમ્મદ અન્સારને સોમવાર સુધી પોલીસ કસ્ટડીમાં મોકલ્યા હતા, જ્યારે અન્ય 12 આરોપીઓને 14 દિવસની ન્યાયિક કસ્ટડીમાં મોકલવામાં આવ્યા હતા. પોલીસે આરોપ લગાવ્યો હતો કે અંસાર અને અસલમ મુખ્ય કાવતરાખોર હતા જેમને 15 એપ્રિલે નીકળેલી ‘શોભાયાત્રા’ વિશે ખબર પડી હતી અને કાવતરું ઘડ્યું હતું. પોલીસે જણાવ્યું હતું કે અસલમ અને અંસારની કસ્ટોડિયલ પૂછપરછ મોટા ષડયંત્ર અને અન્ય લોકોની સંડોવણીનો પર્દાફાશ કરવા માટે જરૂરી છે.
