‘ઓમ શાંતિ ઓમ’ ફિલ્મથી બોલીવૂડમાં પદાર્પણ કરનારી કરનારી દીપિકા બે વર્ષમાં ઇન્ડસ્ટ્રી પર રાજ કરશે તેવું કહેવાય છે. વર્તમાન અને આવતા વર્ષે મોટા બજેટની તેની પાંચ જુદી જુદી ફિલ્મો રીલીઝ થશે. અત્યારે તે પોતાની સુપર–ડુપર હિટ ફિલ્મ ‘પઠાણ’ની ઉજવણી કરી રહી છે. શાહરુખ સાથે જ કારકિર્દીની શરૂઆત કરનારી દીપિકાએ આ વર્ષની શરૂઆતમાં સફળતાની સિક્સ મારીને પોતાની કાબેલિયત સાબિત કરી છે. એવું કહવાય છે કે, બોલીવૂડની અભિનેત્રીમાં દીપિકા પદુકોણની ફી સૌથી વધુ છે. સૂત્રો કહે છે કે, જુદા જુદા નિર્માતાઓએ દીપિકાની આ પાંચ ફિલ્મો પર રૂ. 1475 કરોડનું રોકાણ કરીને જુગાર રમ્યો છે. એક ફિલ્મમાં તો તે પડકારરૂપ એક્શન ભૂમિકામાં જોવા મળશે.
જવાન
શાહરુખ ખાનની નવી એક્શન થ્રીલર ફિલ્મમાં દીપિકા મુખ્ય પાત્ર ભજવી રહી છે. સુપરહિટ ડાયરેક્ટર એટલીના દિગ્દર્શનમાં બની રહેલી ફિલ્મમાં શાહરુખ પણ અનોખી ભૂમિકામાં જોવા મળશે અને ફિલ્મમાં દીપિકાને લેવાનું સૂચન શાહરૂખે જ કર્યું હતું. આ ફિલ્મમાં વિજય સેતુપતિ, નયનતારા, સાન્યા મલ્હોત્રા પણ હશે, અને તે 2 જૂન 2023એ થીએટર્સમાં રિલીઝ થશે.
ફાઈટર
ડાયરેક્ટર સિદ્ધાર્થ આનંદની ફિલ્મમાં દીપિકા–રિતિક રોશન સાથે જોવા મળશે. આ જોડીની જાહેરાત સાથે જ દીપિકા અને રિતિકના ચાહકોમાં ઉત્સાહી બની ગયા છે. ‘ફાઈટર’માં એક્શન દ્રશ્યો કરવા માટે દીપિકાએ ખાસ ટ્રેનિંગ પણ લીધી હોવાનું કહેવાય છે. ફિલ્મનું શૂટિંગ અત્યારે જમ્મુ–કાશ્મીરમાં ચાલી રહ્યું છે અને દીપિકા અને રિતિક થોડા સમય અગાઉ જ, ફિલ્મ ક્રૂ સાથે કાશ્મીર ગયા છે. આ ફિલ્મનું બજેટ રૂ. 250 કરોડ હોવાનું કહેવાય છે અને દીપિકા–રિતિકની સાથે અનિલ કપૂર અને અક્ષય ઓબેરોય મુખ્ય ભૂમિકામાં ભજવી રહ્યા છે.
પ્રોજેક્ટ K
બાહુબલિ તરીકે ઓળખાતા પ્રભાસ સાથે દીપિકા આ ફિલ્મમાં પ્રથમવાર જોડી જમાવશે. મીડિયા સૂત્રોના જણાવ્યા મુજબ, આ ફિલ્મનું બજેટ રૂ. 500 કરોડ નક્કી કરવામાં આવ્યું છે. પ્રભાસ, દીપિકા પાદુકોણ, અમિતાભ બચ્ચન અને દિશા પટાનીનું અનોખું કોમ્બિનેશન ધરાવતી આ ફિલ્મનું શૂટિંગ ભારતના વિવિધ શહેરોમાં થયું છે. અત્યારે ફિલ્મના પોસ્ટ–પ્રોડક્શનનું કામ પૂરજોશમાં ચાલી રહ્યું છે અને ફિલ્મને આગામી વર્ષે જાન્યુઆરી મહિનામાં રિલીઝ કરવામાં આવે તેવી શક્યતા છે.
બ્રહ્માસ્ત્ર પાર્ટ 2 : દેવ
બ્રહ્માસ્ત્રને મળેલી સફળતા પછી ડાયરેક્ટર અયાન મુખર્જી ફિલ્મનો બીજો પાર્ટ બનાવવાની તૈયારી કરી રહ્યા છે. ફેન્ટસી એક્શન ડ્રામા ફિલ્મના બીજા ભાગમાં દીપિકાનું સ્થાન નક્કી થઈ ગયું છે. કહેવાય છે કે, દીપિકા બ્રહ્માસ્ત્ર સિરીઝની બીજી ફિલ્મમાં રણબીર કપૂરની માતા અમ્રિતાના પાત્રમાં જોવા મળશે. પ્રથમભાગમાં ઉલ્લેખ કરવામાં આવેલા પાત્ર દેવની પત્ની તરીકે દીપિકાનો રોલ ગોઠવવામાં આવ્યો છે અને રણબીરના કેરેક્ટર શિવામાં કેવી રીતે શક્તિ આવે છે તે વાતનો ઉલ્લેખ આ ફિલ્મમાં કરવામાં આવશે. ‘બ્રહ્માસ્ત્ર પાર્ટ 2 : દેવ’નું બજેટ રૂ. 410 કરોડ રાખવામાં આવ્યું છે.
સિંઘમ અગેઈન
રોહિત શેટ્ટી તેમના સુપર ડુપર હિટ પોલીસ યુનિવર્સમાં મહિલા પોલીસ ઓફિસરનો સમાવેશ કરી રહ્યા છે. જેમાં દીપિકાની એન્ટ્રી પાકી થઈ ગઈ છે. રોહિત અત્યારે ‘સિંઘમ અગેઈન’ની સ્ક્રિપ્ટ પર કામ કરી રહ્યા છે. અજય દેવગણની સાથે આ ફિલ્મમાં દીપિકા પણ પોલીસ અવતારમાં જોવા મળશે. ફિલ્મનું બજેટ 115 કરોડ નક્કી કરવામાં આવ્યું છે અને ફિલ્મમાં દીપિકા અજયની સાથે આશ્ચર્યજનક એક્શન દ્રશ્યો પરફોર્મ કરતી નજર આવશે.
