ચાલુ વર્ષે 43 દિવસ ચાલેલી પ્રખ્યાત અમરનાથ યાત્રાની શુક્રવારે પૂર્ણાહુતી થઈ હતી. જમ્મુ અને કાશ્મીરના ઉપરાજ્યપાલ મનોજ સિંહાએ સમાપન પૂજા કરી હતી. સિંહાએ જણાવ્યું હતું કે હું આ મુશ્કેલ યાત્રાને અવરોધમુક્ત બનાવવા માટે તમામ પક્ષકારો અને નાગરિકોના નિસ્વાર્થ યોગદાનની પ્રશંસા કરું છે.
રાજભવન ખાતે યોજાયેલી આ વિધિમાં શ્રી અમરનાથજી શ્રાઈન બોર્ડના અધિકારીઓ પણ ઉપસ્થિત રહ્યાં હતા. શ્રાઇન બોર્ડ અને જમ્મુ કાશ્મીર વહીવટીતંત્રે આ પરંપરાગત યાત્રા માટે તમામ વ્યવસ્થાઓ કરી હતી. અમરનાથ યાત્રાનો પ્રારંભ 30 જૂને થયો હતો અને આશરે ત્રણ લાખ યાત્રાળુઓએ તેમાં ભાગ લીધા હતા. કોરોના મહામારીના બે વર્ષ ચાલુ વર્ષે આ યાત્રાનો ફરી પ્રારંભ થયો હતો. અમરનાથ ગુફા પાસે 8 જુલાઈએ વાદળ ફાટતા આશરે 15 યાત્રાળુઓના મોત થયા હતા. આ પછી યાત્રાળુઓની સંખ્યામાં નોંધપાત્ર ઘટાડો થયો હતો.
