અમેરિકન મલ્ટીનેશનલ બેવરેજ કંપની કોકા કોલા કંપની (TCCC) અમદાવાદથી 22 કિમી દૂર આવેલા સાણંદમાં બેવરેજ બેઝ એન્ડ કોન્સેન્ટ્રેટ્સ પ્લાન્ટ સ્થાપવા રૂ.3,000 કરોડનું રોકાણ કરશે. આ સીધું વિદેશી રોકાણ (FDI ઇન્ટરનેશનલ રિફ્રેશમેન્ટ્સ (ઇન્ડિયા) (IRIPL) મારફત કરવામાં આવશે. આ કંપની કોકા કોલા ગ્રૂપની કંપની છે.
ગુજરાત સરકારના સૂત્રોએ ટાંકીને મીડિયા અહેવાલમાં જણાવ્યું કે સાણંદ ઔદ્યોગિક વસાહત-II માં પ્લાન્ટ સ્થાપવા માટે કંપનીને 1.6 લાખ ચોરસ મીટરની જમીનનો પ્લોટ (SM-52) ફાળવવામાં આવ્યો છે.
કોકા કોલાએ ગુજરાતમાં પોતાના બોટલિંગ પાર્ટનર્સ દ્વારા પહેલેથી બે મોટા રોકાણ કરેલા છે. ગુજરાત સરકારે ફટાફટ મંજૂરીની પ્રક્રિયા કરી દીધી છે અને કંપનીને જમીનની ફાળવણી પણ કરી દેવામાં આવી છે. કોકા કોલા અમદાવાદથી 33 કિલોમીટર દૂર ગોબલેજ પાસે પહેલેથી એક ફેસિલીટી ધરાવે છે જેમાં તેની બોટલિંગ પાર્ટનર હિંદુસ્તાન કોકા કોલા બેવરેજ કામ કરે છે. જ્યારે કોકા કોલાની બીજી ફેસિલિટી સાણંદ ખાતે આવેલી છે. આ બંને માટે કોકા કોલાએ કુલ મળીને 18 કરોડ ડોલરનું રોકાણ કરેલું છે
નવો પ્લાન્ટ ફૂલી ઓટોમેટિક હશે જેમાં રોબોટિક ટેક્નોલોજીનો ઉપયોગ કરવામાં આવશે. આ ફેસિલિટી ઈન્ટરનેટ ઓફ થિંગ્સ પર આધારિત હશે અને તેમાં મશીન લર્નિંગ ટેક્નોલોજી એનેબલ્ડ ડિવાઈસ કામ કરશે, જેથી ઉત્પાદન પ્રક્રિયા પર રિયલ ટાઈમ મોનિટરિંગ થઈ શકશે. કોકા કોલાના આ પ્લાન્ટમાં ઓટોમેટેડ સ્ટોરેજ અને રિટ્રિવલ સિસ્ટમ પણ હશે.
આ પ્લાન્ટનું બાંધકામ થશે ત્યારે ત્યારે સ્કીલ્ડ અને અનસ્કીલ્ડ કેટેગરીમાં લગભગ 1000 લોકોને રોજગારી મળશે.
સૂત્રોએ જણાવ્યું કે કોકા કોલાએ અત્યાર સુધીમાં ગુજરાતમાં લગભગ બે લાખ રિટેલર્સ દ્વારા રોજગારીની તક પેદા કરી છે. આ ઉપરાંત 1000 લોકોને પરોક્ષ અથવા પ્રત્યક્ષ રીતે રોજગારી આપી છે. કોકા કોલાના નવા પ્લાન્ટના કારણે ગુજરાતમાં તેને સંલગ્ન બીજા ઉદ્યોગોનો પણ વિકાસ થવાની શક્યતા છે. તેમાં પેકેજિંગ સપ્લાયર્સ, ફ્લેવર ઉત્પાદકો, એન્જિનિયરિંગ સર્વિસિસ, કેપિટલ ગુડ્સ, ઓટોમેશન સેક્ટરને ફાયદો થવાની ધારણા છે.
ગુજરાતમાં ટાટા અને મારુતિ સહિતની ઓટો મોબાઈલ કંપનીઓને આકર્ષવામાં આવ્યા પછી ઈન્ડસ્ટ્રી ફ્રેન્ડલી નીતિના કારણે બીજા ઉદ્યોગો પણ આવી રહ્યા છે. તાજેતરમાં સેમી કન્ડક્ટર પ્લાન્ટ સ્થાપવા માટે પણ કરાર કરવામાં આવ્યા છે. આ ઉપરાંત ડાયમંડ, ટેક્સ્ટાઈલ, કેમિકલ અને પેટ્રોલિયમ ઈન્ડસ્ટ્રીમાં પણ ગુજરાત આખા દેશમાં પહેલેથી અગ્રેસર છે. કંપનીઓને ઈન્ડસ્ટ્રી સ્થાપવા માટે ગુજરાતમાં વધારે ઝડપથી જમીનની ફાળવણી થાય છે
