ચીનમાં કોરોના વાયરસે ફરી એક વખત ઉપાડો લીધો છે. લાંબા સયમ સુધી તાંડવ મચાવ્યા બાદ ચીનમાં કોરોના વાયરસના નવા કેસ એકદમ બંધ થઈ ગયા હતા. પરંતુ હવે ત્યાં ફરીથી કોરોનાના કેસ નોંધાવવાના શરૂ થઈ ગયા છે. બુધવારે ત્યાં કોરોનાના લગભગ 63 નવા કેસ નોંધાયા છે. જેની સાથે જ અહીં બીજા તબક્કામાં કુલ કેસ 1000નો આંક વટાવી ચૂક્યા છે.
ચીની સ્વાસ્થ્ય વિભાગ પ્રમાણે બુધવારના રોજ જે 63 નવા કેસ નોંધાયા છે. તેમાંથી 61 બહારથી આવેલા લોકો છે. એવામાં હવે એ વાતનો ખતરો વધી ગયો છે કે ચીનમાં ક્યાંક આ વાયરસ ફરીથી ન ફેલાવા લાગે. એવામાં આ કેસ એવા સમયે પ્રકાશમાં આવ્યા છે જ્યારે વુહાનમાં લગભગ એક મહિના કરતા વધારેના સમયગાળા બાદ કરફ્યૂ હટાવવામાં આવ્યો છે. નોંધનીય છે કે ચીનમાંથી કરફ્યૂ હટતાની સાથે જ હજારોની સંખ્યામાં લોકો રસ્તાઓ પર નિકળી આવ્યા હતા.
ચીનમાં નવા નોંધાયેલા 63 કેસ ઉપરાંત ચીનમાં બે લોકોના મોત પણ નિપજ્યા છે. જેની સાથે જ કોરોના વાયરસના કારણે મૃત્યુ પામનારા લોકોનો આંકડો 3335 થઈ ગયો છે. જ્યારે કુલ કેસની સંખ્યાએ 81 હજારનો આંક વટાવી દીધો છે. બીજા ફેઝમાં ચીનમાં કોરોના વાયરસના કેસની સંખ્યા 1104 થઈ ગઈ છે.
નોંધનીય છે કે ત્રણ મહિનાની મહેનત બાદ ચીન કોરોના વાયરસને હરાવવામાં સફળ રહ્યો હતો. વુહાનમાંથી પણ લગભગ 73 દિવસ બાદ કરફ્યૂ હટાવવામાં આવ્યો છે. ચીનના સ્વાસ્થ્ય વિભાગનું માનવું છે કે આવું થવા પાછળનું કારણ એ છે કે લોકડાઉન હટ્યા બાદ લોકો મોટી સંખ્યામાં ગમે ત્યાં ફરવા લાગ્યા છે.
કોરોના વાયરસની શરૂઆત પણ ચીનના વુહાનમાંથી જ થઈ હતી. જ્યારબાદ ધીમે-ધીમે આ વાયરસ સમગ્ર દુનિયામાં ફેલાવવાનો શરૂ થઈ ગયો હતો. અત્યારે આ વાયરસના કારણે સમગ્ર દુનિયામાં 10 લાખથી વધારે લોકો કોરોનાની લપેટમાં આવી ચૂક્યા છે. જ્યારે 70 હજારથી વધારે લોકો આ વાયરસના કારણે પોતાના જીવ ગુમાવી ચૂક્યા છે. કોરોના વાયરસની સૌથી માઠી અસર અમેરિકા પર પડી છે ત્યાં ચાર લાખથી વધારે લોકો કોરોનાની લપેટમાં આવી ચૂક્યા છે.
