ફરજિયાત વેક્સિનેશન અને લોકડાઉનના વિરોધ કરવા માટે લોકોએ શનિવાર (29 જાન્યુ)એ કેનેડાના વડાપ્રધાનના નિવાસસ્થાનને ઘેરી લીધું હતું. કેનેડાની રાજધાની ઓટોવામાં સ્થિત વડાપ્રધાનના નિવાસ સ્થાનને 50 હજાર ટ્રક ચાલકોએ પોતાની 20 હજાર ટ્રકોથી ઘેરી લીધું હતું અને સ્થિતિ એટલી વણસી ગઈ કે વડાપ્રધાન જસ્ટિન ટ્રૂડોએ પોતાના પરિવાર સહિત ગુપ્ત સ્થાન પર છુપાવવા માટે જવુ પડ્યું હતું.
ઉલ્લેખનીય છે કે દેશમાં કોરોનાની રસીને ફરજિયાત કરવાનો અને લોકડાઉનનો વિરોધ આ ટ્રક ડ્રાઈવર્સ કરી રહ્યા છે. આ ટ્રક ચાલકોએ પોતાના લગભગ 70 કિમી લાંબા કાફલાને ફ્રીડમ કોન્વોય નામ આપ્યું હતું.શનિવારના રોજ હજારોની સંખ્યામાં ટ્રક ચાલકો ઓટાવામાં ભેગા થયા અને અમેરિકન બોર્ડર ક્રોસ કરવા માટે રસીને ફરજિયાત કરવાના નિયમનો વિરોધ કર્યો હતો. આ પહેલા પણ કેનેડાના વડાપ્રધાન જસ્ટિન ટ્રૂડોએ એક વિવાદાસ્પદ નિવેદન આપ્યુ હતું જેમાં તેમણે ટ્રક ચાલકોને ઓછું મહત્વ ધરાવતા લઘુમતી કહ્યા હતા, જેના કારણે પણ ટ્રક ચાલકો વધારે રોષે ભરાયા છે. રાજધાની ઓટાવા તરફ જતા રસ્તા પર 70 કિમી સુધી બસ ટ્રક જ ટ્રક દેખાઈ રહી હતી.
ટ્રક ચાલકોને વિશ્વના સૌથી ધનિક વ્યક્તિ એલન મસ્કનો પણ સાથ મળી ગયો હતો. એલન મસ્કે ટ્વિટ કરીને કહ્યું છે કે, આ આંદોલનની ગૂંજ હવે અમેરિકા સુધી સંભળાઈ રહી છે. આ ટ્રક ચાલકો કેનેડાના ધ્વજને લહેરાવી રહ્યા છે અને આઝાદીની માંગ વાળા ધ્વજ પણ તેમની પાસે છે. તે વડાપ્રધાન ટ્રૂડો વિરુદ્ધ નારેબાજી કરી રહ્યા છે. આ આંદોલનમાં ટ્રક ચાલકોને હજારોની સંખ્યામાં લોકોનો સાથ મળી રહ્યો છે. આ તમામ લોકો કોરોનાના પ્રતિબંધોને કારણે રોષે ભરાયેલા છે.ઓટાવાના રસ્તા પર વિશાળકાય ટ્રકોના અવાજ સતત સંભળાઈ રહ્યા છે અને ડ્રાઈવર્સ હોર્ન વગાડી વગાડીને સરકારનો વિરોધ કરી રહ્યા છે. તેઓ સંસદ પાસે પહોંચી ગયા છે. મીડિયા રિપોર્ટ અનુસાર, કેનેડાના વડાપ્રધાન પોતાના પરિવાર સાથે સુરક્ષિત અને ગુપ્ત સ્થાન પર પહોંચી ગયા છે. વડાપ્રધાન જસ્ટિન ટ્રૂડોએ કહ્યુ હતું કે, ટ્રક ચાલકો વિજ્ઞાનના વિરોધી છે. તેઓ માત્ર પોતાના માટે જ નહીં, કેનેડાના અન્ય લોકો માટે પણ જોખમ ઉભું કરી રહ્યા છે. ઉલ્લેખનીય છે કે કેનેડામાં અત્યાર સુધી 82 ટકા લોકોને કોરોનાની રસી લાગી ચૂકી છે.
