એશિયન બિઝનેસ એવોર્ડ્સમાં અગ્રણી ઉદ્યોગસાહસિકોને એવોર્ડ્સ એનાયત કરાયા

એશિયન બિઝનેસ એવોર્ડ્સનીની ઐતિહાસિક 25મી વર્ષગાંઠની ઉજવણી કરાઇ

• સરવર આલમ

સેન્ટ્રલ લંડનના વેસ્ટ મિન્સ્ટર બ્રિજના છેવાડે થેમ્સ નદીના તટે આવેલ ભવ્ય પાર્ક પ્લાઝા હોટેલમાં તા. 22ના રોજ યોજાયેલા પ્રતિષ્ઠિત એશિયન બિઝનેસ એવોર્ડ્સની 25મી વર્ષગાંઠ પ્રસંગે ચેરિટેબલ હેતુઓ માટે એક બિલિયન પાઉન્ડથી વધુ રકમનું દાન કરનાર પ્રેરણાત્મક બિઝનેસમેન નિર્મલ સેઠિયાને ‘બિઝનેસ ઑફ ધ યર’નો એવોર્ડ એનાયત કરવામાં આવ્યો હતો. આ પ્રસંગે બ્રિટનમાં સાઉથ એશિયાના 101 સૌથી ધનાઢ્ય બિઝનેસમેન્સનો સમાવેશ કરતા વાર્ષિક એશિયન રિચ લિસ્ટની નવીનતમ આવૃત્તિનું લોન્ચિંગ પણ કરવામાં આવ્યું હતું.

આ ભવ્ય સમારંભમાં કુલ નવ એવોર્ડ એનાયત કરવામાં આવ્યા હતા અને કાર્યક્રમમાં લંડનના મેયર સાદિક ખાન, દેશના ડેપ્યુટી પ્રાઇમ મિનિસ્ટર ઓલિવર ડાઉડેન અને યુકેમાં ભારતના હાઈ કમિશનર વિક્રમ દોરાઈસ્વામી સહિત બિલિયોનેર ઉદ્યોગસાહસિકો, ઉદ્યોગ અગ્રણીઓ, શક્તિશાળી રાજકારણીઓ અને સામાજીક અગ્રણીઓ સહિત 600થી વધુ મહેમાનોએ હાજરી આપી હતી.

વડાપ્રધાન ઋષિ સુનકે આ કાર્યક્રમમાં રેકોર્ડ કરેલા સંદેશામાં યુકેમાં એશિયન ઈમિગ્રન્ટ્સના યોગદાનની પ્રશંસા કરતાં જણાવ્યું હતું કે “તમારામાંથી કોઈને આશ્ચર્ય થશે નહીં કે થિંક-ટેન્ક ઓપન (ઓપન પોલિટિકલ ઈકોનોમી નેટવર્ક) મુજબ, વંશીય લઘુમતીના ઉદ્યોગસાહસિકો યુકેના અર્થતંત્રમાં ઓછામાં ઓછા £74 બિલિયનનું યોગદાન આપે છે. એ બહુ મોટું યોગદાન છે. એશિયન બિઝનેસીસ સંપત્તિ અને નોકરીઓ ઉત્પન્ન કરે છે, જે સમગ્ર દેશમાં લાખો લોકોને રોજગાર આપે છે. તમે બધા જે અવિશ્વસનીય કાર્ય કરો છો તેના માટે અમે ખૂબ જ આભારી અને ગર્વ અનુભવીએ છીએ.”

101 સૌથી ધનાઢ્ય બિઝનેસમેન્સનો સમાવેશ કરતા એશિયન રિચ લિસ્ટમાં ટોચના સ્થાને £33.5 બિલિયનની અંદાજિત સંપત્તિ સાથે હિંદુજા પરિવાર છે, ત્યારબાદ સ્ટીલ ઉદ્યોગપતિ લક્ષ્મી મિત્તલ અને તેમના પુત્ર આદિત્ય (£12.9 બિલિયન) અને પેટ્રોકેમિકલ્સ ઈન્ડોરામાના ચેરમેન ઉદ્યોગપતિ શ્રી પ્રકાશ લોહિયા (£10.1 બિલિયન)નો સમાવેશ થાય છે.

2023માં યુકેમાં 101 સૌથી ધનાઢ્ય એશિયનોની સંયુક્ત સંપત્તિ £120 બિલિયન કરતાં વધુ છે, જે પાછલા વર્ષમાં £6.8 બિલિયનનો વધારો છે. આ વર્ષની યાદીમાં 16 બિલિયોનેર છે અને પાંચ નવી એન્ટ્રી છે.

લંડનના મેયર સાદિક ખાને કટાક્ષ કર્યો હતો કે જો વર્તમાન ટોરી સરકાર 30 વર્ષ પહેલા સત્તામાં આવી હોત તો “આ એવોર્ડ રવાંડામાં યોજાતો હોત.”

ખાને એશિયન ઉદ્યોગસાહસિકોએ યુકેમાં આપેલા પુષ્કળ યોગદાનને માન્યતા આપતા કહ્યું હતું કે “એશિયન બિઝનેસીસની સફળતા હવે આપણી રાષ્ટ્રીય ઓળખમાં ઊંડી રીતે જોડાયેલી છે અને તેના ઘણા સ્થાપકો ઇમિગ્રન્ટ્સ તરીકે આવ્યા હતા. ઇમિગ્રન્ટ્સ ઇનોવેટર છે, તેઓ સંપત્તિના સર્જકો છે, તેઓ એવા લોકો છે જેઓ આપણા સમાજ, અર્થતંત્ર અને સંસ્કૃતિને સુધારી શકે છે. આજે રાત્રે આ હોલમાં હાજર પુરૂષો અને સ્ત્રીઓ આપણા દેશને શક્તિ આપવામાં અને આપણા શહેરને વિશ્વનું સૌથી મહાન શહેર બનાવવામાં મદદ કરે છે.”

ડેપ્યુટી પ્રઇમ મિનિસ્ટર ડાઉડેને એશિયન બિઝનેસીસની “અતૂટ મહત્વાકાંક્ષા, સખત મહેનત અને નિશ્ચય”ની સરાહના કરતાં કહ્યું હતું કે “બ્રિટિશ એશિયન બિઝનેસીસની સફળતાએ દવાથી ઉત્પાદન, ખોરાકથી ખેડૂત, સ્ટીલથી રીટેલ, સર્જનાત્મકતાથી ટેક સુધીના ઘણા ક્ષેત્રોને અસર કરી છે. ફરી ફરીને, એશિયન હેરિટેજના લોકો સફળતાના માર્ગે આગળ વધ્યા છે, જેમાં મારે એક તેજસ્વી યુવાન છોકરો ઉમેરવો જોઈએ જેણે ફાર્મસીમાં મદદ કરવાનું શરૂ કર્યું હતું. સાઉધમ્પ્ટનની એક નાની દુકાનથી 10 ડાઉનિંગ સ્ટ્રીટ સુધીનો રસ્તો કાપનાર માણસ, આ મહાન દેશમાં કંઈપણ શક્ય છે તે બતાવનાર વ્યક્તિ, આપણા પ્રથમ બ્રિટિશ એશિયન વડા પ્રધાન, તમારા મિત્ર અને મારા બોસ, ઋષિ સુનક છે.”

AMGના મેનેજિંગ એડિટર કલ્પેશ સોલંકીએ જણાવ્યું હતું કે, “યુકેમાં એશિયન બિઝનેસીસ અર્થતંત્ર માટે મહત્વપૂર્ણ છે – સ્ટીલથી બેંકિંગ, ફાર્માથી હોસ્પિટાલિટી અને રિટેલથી પ્રોપર્ટી ક્ષેત્ર સુધી એશિયન બિઝનેસીસ વ્યાપેલા છે. એશિયન સાહસિકો તક જુએ છે. જ્યાં અન્ય લોકો પડકારનો સામનો કરે છે, અને જોખમ લેવાની તેમની ભૂખને વ્યવહારિકતા, સખત મહેનત અને ઇમિગ્રન્ટ્સમાં વ્યાપેલા સામાન્ય સ્થિતિસ્થાપકતાના વલણ દ્વારા તેને સમર્થન મળે છે.’’

તેમણે જણાવ્યું હતું કે “એશિયન ઉદ્યોગપતિઓની આગામી પેઢીએ તેમના પૂર્વજો દ્વારા બાંધવામાં આવેલા સામ્રાજ્યોનું સુકાન સંભાળવા સાથે, ઘણા નવા બજારોમાં વૈવિધ્યીકરણ કરી રહ્યા છે અને નિર્ણાયક રીતે, તેઓ જે સમુદાયોમાં રહે છે તેમને પણ પાછું આપી રહ્યા છે. સફળતાની આ વાર્તાઓને ઉજવવી જોઈએ અને પ્રકાશિત કરવી જોઈએ – તે આગામી ઉદ્યોગસાહસિકો, સ્ટાર્ટઅપ સ્થાપકો અને બ્રિટન અને તેનાથી આગળ તેમની છાપ બનાવવા માંગતા બિઝનેસીસના નવા તરંગને પ્રેરણા આપશે.”

AMGના એક્ઝિક્યુટિવ એડિટર શૈલેષ સોલંકીએ જણાવ્યું હતું કે “એશિયન રિચ લિસ્ટ એ બ્રિટનમાં એશિયન સંપત્તિ માટે સૌથી અધિકૃત માર્ગદર્શિકા છે અને અમારું વિશ્લેષણ એશિયન સાહસિકોની સાચી સ્થિતિસ્થાપકતા દર્શાવે છે. ઊંચા ફુગાવાના દબાણ અને સ્થિર વૃદ્ધિ હોવા છતાં, અમારી યાદીમાં સામેલ એશિયન સાહસિકોએ પાછલા વર્ષમાં તેમની સંપત્તિમાં £6.8 બિલિયનનો વધારો કર્યો છે અને તેમની કુલ કુલ સંપત્તિ £120 બિલિયનથી પણ ઉપર છે.’’

તેમણે જણાવ્યું હતું કે “એશિયન સાહસિકોએ એક એન્ટરપ્રાઇઝ બ્રિટન બનાવવામાં મદદ કરી છે, અને અમે એશિયન રિચ લિસ્ટમાં સામેલ ઉદ્યોગસાહસિકોને તેમની ચાતુર્ય, ડ્રાઇવ, ઊર્જા અને જુસ્સા માટે સલામ કરીએ છીએ જે એશિયન બિઝનેસ સમુદાયની આગવી ઓળખ છે.’’

એશિયન મીડિયા ગ્રુપના હેડ ઓફ ડિજિટલ એન્ડ ઈન્ડિયા શ્રી આદિત્ય સોલંકીએ જણાવ્યું હતું કે “અમે છેલ્લા 25 વર્ષમાં એશિયન બિઝનેસ કોમ્યુનિટીની નિર્ણાયક સફરને ખૂબ જ ગર્વ સાથે પ્રતિબિંબિત કરીએ છીએ. એક નમ્ર શરૂઆતથી લઈને, વિવિધ ઉદ્યોગોમાં નોંધપાત્ર હાજરીને કમાન્ડ કરવા સુધી, એશિયન સમુદાયે અપ્રતિમ નિશ્ચય, કૌશલ્ય અને શ્રેષ્ઠતા માટે પ્રતિબદ્ધતા દર્શાવી છે. છેલ્લાં 25 વર્ષોમાં, અમે સ્વપ્નદ્રષ્ટા નેતાઓના ઉદયના સાક્ષી બન્યા છીએ જેમણે માત્ર પોતાના ક્ષેત્રોમાં જ ઉત્કૃષ્ટ દેખાવ કર્યો નથી, પરંતુ ઉદ્યોગસાહસિકોની આગામી પેઢી માટે પણ માર્ગ મોકળો કર્યો છે. એશિયન બિઝનેસ એવોર્ડ્સ આવા નેતાઓ અને વ્યક્તિઓને ઓળખવા અને બિરદાવવા માટે એક પ્લેટફોર્મ તરીકે સેવા આપે છે.”

કાર્યક્રમમાં આવેલા મહેમાનોએ એજ્યુકેશન ચેરિટી પ્રથમ માટે પણ ભંડોળ એકત્ર કર્યું હતું, જે ભારતમાં વંચિત બાળકોને મદદ કરે છે.

બીબીસી પ્રસ્તુતકર્તા નિહાલ અર્થનાયકે આ કાર્યક્રમનું આયોજન કર્યું હતું, જેના પ્રાયોજકો અને સમર્થકોમાં વેસ્ટકોમ્બ ગ્રુપ, ઓકનોર્થ બેંક, કૂલેશ શાહ ફાઉન્ડેશન અને રીજન્ટ ગ્રુપનો સમાવેશ થાય છે.

એશિયન બિઝનેસ એવોર્ડ્સનું લાગલગાટ 25 વર્ષથી એશિયન મીડિયા ગ્રુપ દ્વારા આયોજન કરાય છે. જે ગૃપ ઈસ્ટર્ન આઈ અને ગરવી ગુજરાત સમાચાર સાપ્તાહિકો તેમજ એશિયન રિચ લિસ્ટ અને GG2 પાવર લિસ્ટ પ્રકાશિત કરે છે.

આ સમારોહમાં જાણીતા અગ્રણી ઉદ્યોગસાહસિકોમાં વાઇટાબાયોટિક્સના સીઇઓ તેજ લાલવાણીને હેલ્થકેર બિઝનેસ ઓફ ધ યર એવોર્ડ એનાયત કરાયો હતો. તો ફૂડ એન્ડ ડ્રિંક બિઝનેસ ઓફ ધ યર એવોર્ડ ફૂડસ્પીડ લિ.ના મેનેજિંગ ડિરેક્ટર બોબી બાવાને મળ્યો હતો.

જાણીતા ગુજરાતી સખાવતી વ્રજ પાનખણીયા અને પરિવારને ફિલાન્થ્રોપી એવોર્ડ અર્પણ કરાયો હતો. આ ઉપરાંત ઈસ્ટર્ન આઈ ઈન્સ્પાયર એવોર્ડ બેંક ઓફ ઈંગ્લેન્ડ મોનેટરી પોલિસી કમિટીના બાહ્ય સભ્ય ડૉ. સ્વાતિ ઢીંગરાને આપવામાં આવ્યો હતો.

કરાલી નોર્થ અમેરિકાના કો-સીઈઓ કરીમ જાનમોહમદને યંગ એન્ટ્રપ્રિન્યોર ઓફ ધ યરનો એવોર્ડ એનાયત કરાયો હતો. તો ઝી ટીવીના યુકેના ટેરિટરી હેડ પારુલ ગોયલને મીડિયા પર્સનાલિટી ઓફ ધ યર એવોર્ડ અર્પણ કરાયો હતો.

રિજન્ટ ગ્રૂપના સ્થાપક અને સીઈઓ ડૉ. સેલવા પંકજને એજ્યુકેશન એમ્પાયર બનાવવાના તેમના કાર્ય માટે ઈસ્ટર્ન આઈ એન્ટ્રપ્રેન્યોર ઑફ ધ યર એવોર્ડ એનાયત કરાયો હતો. જ્યારે નેક્સ્ટ જનરલ લીડર ઓફ ધ યર એવોર્ડ અરોરા ગ્રુપના ચીફ ઓપરેટિંગ ઓફિસર સંજય અરોરાને આપવામાં આવ્યો હતો.

બીબીસી પ્રેઝન્ટર નિહાલ અર્થનાયકેએ આ કાર્યક્રમને હોસ્ટ કર્યો હતો અને વેસ્ટકમ્બ ગ્રુપ, ઓકનોર્થ બેંક, કૂલેશ શાહ ફાઉન્ડેશન અને રીજન્ટ ગ્રુપ તેના પ્રાયોજક અને સમર્થક તરીકે જોડાયા હતા.

એશિયન રિચ લિસ્ટની નવીનતમ આવૃત્તિ ખરીદવા માટે જુઓ, www.easterneye.biz/ARL/subscribe/ અથવા સૌરીન શાહને [email protected] પર ઈમેલ કરો કે 0207 654 7737 ઉપર કૉલ કરો.