સાઇબર ફ્રોડના કેસોમાં તેલંગણા અને કેરળ રાજ્ય પોલીસની સૂચનાને પગલે આ બે રાજ્યોમાં સંબંધિત બેંકો દ્વારા સુરતની ઓછામાં ઓછી 27 ડાયમંડ મેન્યુફેક્ચરિંગ અને ટ્રેડિંગ કંપનીઓના બેંક ખાતાઓ બ્લોક કરવામાં આવ્યા હતાં. આ કંપનીઓમાં કેટલીક ટોચની નેચરલ ડાયમંડ ઉત્પાદક કંપનીઓ પણ સામેલ છે જેઓ દુનિયાભરમાં પોતાની ઓફિસ ધરાવે છે. તેલંગણા અને કેરળમાં સાઈબર ફ્રોડના કેસની તપાસ દરમિયાન પોલીસને જાણવા મળ્યું કે કેટલીક ડાયમંડ પેઢીઓ શંકાસ્પદ ટ્રાન્ઝેક્શન સાથે સંકળાયેલી હતી. ગુરુવારે હીરાના એક વેપારીએ કેન્દ્રીય ગૃહ પ્રધાન અમિત શાહ સમક્ષ રજૂઆત કરી આક્ષેપ કર્યો કે સાયબર પોલીસ છેલ્લા બે વર્ષથી તેમની સામે આવી કાર્યવાહી કરી રહી છે, જે હેરાનગતિ સમાન છે.
ડાયમંડ કંપનીઓ આશરે રૂ.10 કરોડ રૂપિયાથી વધારે ટર્નઓવર ધરાવે છે. દરેક કંપની અલગ અલગ પ્રકારના ટ્રાન્ઝેક્શન માટે ઓછામાં ઓછા ત્રણ બેન્ક એકાઉન્ટ ધરાવે છે. આ ખાતા લગભગ છેલ્લા 20 દિવસથી ફ્રીઝ કરી દેવાયા છે.
GJEPCના ડિરેક્ટર દિનેશ નાવડિયાએ જણાવ્યું કે પોલીસે માત્ર જ્વેલરી પેઢીઓના એકાઉન્ટ સિઝ નથી કર્યા, પરંતુ તેની સાથે લિંક થયેલા બધા એકાઉન્ટ પણ સિઝ કરવામાં આવ્યા છે. તેના કારણે ડાયમંડ પેઢીઓ માટે ઘણી મુશ્કેલી પેદા થઈ છે કારણ કે તેઓ નાણાં ઉપાડ્યા વગર પેમેન્ટ કરી શકે તેમ નથી.
ડાયમંડ ઈન્ડસ્ટ્રીના એક બિઝનેસમેને જણાવ્યું કે, “મેં એક કંપનીને રફ ડાયમંડ વેચ્યા છે, પરંતુ તેના બેન્ક ખાતા બ્લોક કરી દેવાયા છે. મારા એકાઉન્ટમાં પણ તે કંપની તરફથી ટ્રાન્ઝેક્શન કરવામાં આવ્યા છે. તેથી મારું કરન્ટ અને સેવિંગ્સ બેન્ક એકાઉન્ટ પણ સિઝ કરી દેવાયું છે. ડાયમંડ ઈન્ડસ્ટ્રીના લોકોએ આ વિશે બેન્કોને ઘણી વખત રજુઆત કરી હોવા છતાં તેમના તરફથી કોઈ જવાબ આપવામાં નથી આવ્યો. ફ્રીઝર ઓર્ડર કઈ રીતે પરત ખેંચાશે તે પણ જાણવા મળ્યું ન હોવાના કારણે ડાયમંડ યુનિટ્સે હવે તેનો ઉકેલ લાવવા માટે સરકારનો સંપર્ક કરવાનું નક્કી કર્યું છે.”
આ અગાઉ ડાયમંડ યુનિટ્સે જેમ એન્ડ જ્વેલરી એક્સપોર્ટ પ્રમોશન કાઉન્સિલનો સંપર્ક કરીને તેમને આ ઈશ્યૂ વિશે ફરિયાદ કરી હતી. ડાયમંડ પેઢીઓને એ વાતની ચિંતા છે કે માત્ર તેમના ડાયરેક્ટ લિંક એકાઉન્ટ બંધ નથી થયા, પરંતુ સેકન્ડરી અને ટર્શરી લિંક પણ બ્લોક કરી દેવામાં આવી છે.
