કિંગ ચાર્લ્સ III ને 2025થી રાજાશાહીના જાહેર ભંડોળમાં 45 ટકાના વધારા સાથે સરકારની યોજના અનુસાર યુકેના કરદાતા પાસેથી જંગી પગાર વધારો મળનાર છે. કિંગ ચાર્લ્સને મળતી રકમ £86 મિલિયનથી વધીને £125 મિલિયન થવાની ધારણા છે.
આવતા વર્ષે, સોવરીન ગ્રાન્ટ £86.3 મિલિયન પર યથાવત રહેશે. 2025માં, રાજાના જાહેર ભંડોળમાં અંદાજિત £38.5 મિલિયનનો વધારો થશે અને 2026માં તે કુલ £126 મિલિયન થશે.
સોવરીન ગ્રાન્ટ નક્કી કરવા માટે વપરાતી જટિલ ફોર્મ્યુલા 2011માં તત્કાલીન વડા પ્રધાન ડેવિડ કેમરન અને તેમના ચાન્સેલર જ્યોર્જ ઓસબોર્ન દ્વારા રજૂ કરવામાં આવી હતી. શાહી ભંડોળ પર સંસદના સદીઓ જૂના નિયંત્રણને દૂર કરીને તેમણે એક નવું સૂત્ર બનાવ્યું હતું જેણે રાજાના ભંડોળને ક્રાઉન એસ્ટેટના નફાની ટકાવારી સાથે જોડ્યું હતું. નવી વ્યવસ્થા હેઠળ, તે ટકાવારી કહેવાતા શાહી ટ્રસ્ટીઓ વડા પ્રધાન, ચાન્સેલર અને રાજાના નાણાકીય સલાહકાર દ્વારા નક્કી કરવામાં આવે છે. 2017 થી, તેમણે એસ્ટેટના ચોખ્ખા નફાના 25 ટકાના દરે ટકાવારી સેટ કરી છે, પરિણામે રાજાશાહી માટે ભંડોળમાં સતત વધારો થયો છે કારણ કે તેનો નફો વધ્યો છે.
