બોલિવૂડમાં પોતાનું આગવું સ્થાન જમાવી ચૂકેલી ક્રિતિ સેનન માટે અત્યારે કપરો સમય ચાલી રહ્યો છે. ક્રિતિએ મોટા સ્ટાર્સ સાથે બિગ બજેટ ફિલ્મોમાં કામ કર્યું છે, પરંતુ તેની આ ફિલ્મો બોક્સઓફિસ પર ખાસ સફળ થઇ શકી નથી. છેલ્લા દોઢ વર્ષમાં તેની ચાર ફિલ્મો ફ્લોપ ગઈ છે. જેમાં બચ્ચન પાંડેથી લઈને આદિપુરુષ સુધીની ફિલ્મોનો સમાવેશ થાય છે. પ્રભાસ અને સૈફ અલી ખાન સાથેની તેની ફિલ્મ આદિપુરુષ અત્યારે ચર્ચામાં છે. આ ફિલ્મે રિલીઝના પ્રથમ દિવસે તો રૂ. 140 કરોડનું કલેક્શન મેળવ્યું હતું, પરંતુ બીજા દિવસથી તેમાં ઘટાડો જોવા મળ્યો છે. એવું પણ કહેવાય છે કે આદિપુરુષમાં ખર્ચાયેલું બજેટ સરભર થવાનું પણ અઘરું લાગે છે. આ સ્થિતિમાં ક્રિતિના નામે સતત ચોથી ફ્લોપ ફિલ્મ નોંધાઈ છે.
અગાઉ ક્રિતિએ કાર્તિક આર્યન સાથે શહઝાદામાં લીડ રોલ કર્યો હતો. આ ફિલ્મ સુપર ફ્લોપ રહી હતી. પાછલા વર્ષે વરુણ ધવન સાથેની ભેડિયા પણ બોક્સઓફિસ પર નિષ્ફળ ગઈ હતી. અરશદ વારસી અને અક્ષયકુમાર જેવાં બે દિગ્ગજો હોવા છતાં બચ્ચન પાંડે પણ ખાસ કમાલ કરી શકી ન હતી. ચાર ફ્લોપ ફિલ્મો આપવા છતાં ક્રિતિ પાસે કમબેકના ચાન્સ છે. ટાઈગર શ્રોફની એક્શન-થ્રિલરમાં ક્રિતિનો લીડ રોલ છે. આ ફિલ્મ ઓક્ટોબરમાં રિલીઝ થશે. આ ઉપરાંત શાહિદ કપૂર સાથેની એક ફિલ્મ અને ક્રૂમાં પણ તે જોવા મળશે. આ ત્રણ ફિલ્મોના આધારે ક્રિતિની કારકિર્દીની દિશા નક્કી થશે.
