બિલિયોનેર ઉદ્યોગપતિ મુકેશ અંબાણીના વડપણ હેઠળની રિલાયન્સ ઇન્ડસ્ટ્રીઝ અમેરિકાની અગ્રણી કોસ્મેટિક્સ કંપની રેવલોન ઇન્ક.ને હસ્તગત કરવાનું વિચારી રહી છે. કંપનીએ ચાલુ સપ્તાહે નાદારીની અરજી કર્યા બાદ વૈશ્વિક કંપનીઓ રેવલોનને ખરીદવાની સ્પર્ધામાં છે. ઉલ્લેખનીય છે કે, વૈશ્વિક સપ્લાય ચેઇન ખોરવાતા રેવલોનના કાચા માલના ખર્ચમાં વધારો નોંધાયો હતો અને સપ્લાયર્સે કંપની પાસે આગોતરી ચુકવણીની માંગણી કરી હતી. રિલાયન્સે છેલ્લા કેટલાક સમયમાં ફેશન અને પર્સનલ કેસ બિઝનેસમાં ઝંપલાવ્યું છે ત્યારે રેવલોનનું એક્વિઝિશન તેને વૃદ્ધિની સારી તક પૂરી પાડી શકે. અહેવાલને પગલે અમેરિકામાં રેવલોનનો શેરના ભાવમાં અસાધારણ ઉછાળો આવ્યો હતો.
જોકે, રિલાયન્સે આ મુદ્દે કશું કહેવાનો ઇનકાર કર્યો હતો. રેવલોન ૯૦ વર્ષ જૂની કંપની છે અને તેનો સમાવેશ વિશ્વની અગ્રણી કોસ્મેટિક બ્રાન્ડ્સમાં થાય છે.
રેવલોન પહેલેથી જ ઋણબોજ હેઠળ દબાયેલી હતી. મહામારીને કારણે તેની સમસ્યામાં વધારો થયો હતો. કોરોનામાં માસ્કને કારણે લિપસ્ટિકની માંગમાં ધરખમ ઘટાડો નોંધાયો હતો. મહામારીના પહેલા વર્ષે ૨૦૨૦માં કંપનીનું વેચાણ ૨૧ ટકા ઘટ્યું હતું. જોકે, તાજેતરના વર્ષમાં તેમાં ૯.૨ ટકા વૃદ્ધિ થઈ હતી. માર્ચમાં પૂરા થયેલા ત્રિમાસિક ગાળામાં રેવલોનનું વેચાણ લગભગ ૮ ટકા વધ્યું હતું, પણ હજુ તે કોરોના અગાઉના વાર્ષિક ૨.૪ અબજ ડોલરના સ્તરથી ઓછું છે.
