પશ્ચિમ બંગાળ વિધાનસભાની ચૂંટણીમાં ભવ્ય વિજયના સાત મહિના બાદ મમતા બેનરજીની તૃણમુલ કોંગ્રેસ (ટીએમસી)એ કોલકતા મ્યુનિસિપલ કોર્પોરેશનમાં શાનદાર વિજય સાથે સત્તા પર રહેવાની હેટ-ટ્રીક કરી હતી. કોલકાતા મ્યુનિસિપલ કોર્પોરેશનની ચૂંટણીમાં બંપર વિજય બાદ તૃણમૂલ કોંગ્રેસના સુપ્રીમો મમતા બેનર્જીએ આસામના ગુવાહાટી ખાતે માતા કામાખ્યા દેવીના મંદિરમાં પૂજા કરી હતી અને આશીર્વાદ માગ્યા હતા.
કોલકાતા નગર નિગમની ચૂંટણીમાં કુલ 144 બેઠકો પરથી 134 બેઠકો પર ટીએમસીને વિજય મળ્યો હતો. જ્યારે ભાજપને 3 બેઠક પર, કોંગ્રેસને 2 બેઠક પર, લેફ્ટને 2 બેઠક પર જીત મળી હતી. તે સિવાય 3 બેઠકો પર અપક્ષને જીત મળી છે. ટીએમસીને 71.95 ટકા મત મળ્યા હતા જ્યારે ભાજપને 08.94 ટકા, કોંગ્રેસને 04.47 ટકા, લેફ્ટને 11 ટકા મત મળ્યા છે.
