યુરોપમાં ગયા સપ્તાહે કોરોનાના કેસમાં 11 ટકાનો ઉછાળો આવ્યો હતો. યુરોપ વિશ્વનો એકમાત્ર એવો વિસ્તાર છે કે જ્યાં મધ્ય ઓક્ટોબરથી કોરોના કેસોમાં સતત વધારો થઈ રહ્યો છે, એમ વિશ્વ આરોગ્ય સંગઠન (WHO)એ જણાવ્યું હતું. WHOના યુરોપ ડિરેક્ટર ડો. હાન્સ ક્લુજે ચેતવણી આપી હતી કે જો તાકીદે પગલાં લેવામાં નહીં આવે તો યુરોપમાં વસંતઋતુ સુધીમાં વધુ 7 લાખ લોકોના મોત થઈ શકે છે.
મંગળવારે જારી કરવામાં આવેલા કોરોના મહામારીના સાપ્તાહિક આકલનમાં યુએનની આ હેલ્થ એજન્સીએ જણાવ્યું હતું કે ગયા સપ્તાહે વિશ્વમાં કોરોના કેસ અને મૃત્યુમાં આશરે છ ટકાનો વધારો થયો છે. આ સમયગાળામાં કોરોનાના નવા 36 લાખ કેસ નોંધાયા હતા અને 5,100નો મોત થયા હતા.
WHOના યુરોપ ડિરેક્ટર ડો. હાન્સ ક્લુજે જણાવ્યું હતું કે યુરોપ કોરોના મહામારીની ઘેરી પકડમાં છે. કોરોનાને કાબુમાં લેવા યુરોપના દેશોએ વેક્સિનેશનમાં વધારો કરવા તથા માસ્ક અને સોસિયલ ડિસ્ટન્સ જેવા બીજા પગલાં લેવાની જરૂર છે અને લોકડાઉન છેલ્લો વિકલ્પ છે. વિશ્વ આરોગ્ય સંસ્થા હેઠળના યુરોપ રિજનમાં વેક્સિનના એક અબજથી વધુ ડોઝ આપવામાં આવ્યા છે. જોકે વિવિધ દેશોમાં વેક્સિનેશનના કવરેજ 10થી 80 ટકા જેટલો તફાવત છે.
ગયા સપ્તાહે ઓસ્ટ્રીયા, નેધરલેન્ડ અને બેલ્જિયમે કોરોનાના ફેલાવાને અટકાવવા માટે આંશિક લોકડાઉન સહિતના આકરા પગલાં લીધા છે.
વિશ્વ આરોગ્ય સંસ્થાના જણાવ્યા અનુસાર દક્ષિણ પૂર્વ એશિયા અને મધ્યપૂર્વમાં કોરોનાના કેસોમાં અનુક્રમે 11 ટકા અને 9 ટકાનો ઘટાડો થયો છે. ગયા સપ્તાહે કોરોના મૃત્યુમાં સૌથી વધુ ઘટાડો આફ્રિકામાં થયો હતો. આફ્રિકામાં મોતની સંખ્યામાં 30 ટકાનો ઘટાડો થયો હતો અને જૂન પછીથી તેમાં ઘટાડાનો ટ્રેન્ડ છે. અમેરિકામાં કોરોના કેસોમાં મોટો વધારો કે ઘટાડો થયો નથી, પરંતુ મોતની સંખ્યામાં આશરે 19 ટકાનો વધારો થયો હતો. વિશ્વમાં કોરોનાનો ઝડપથી ફેલાતો વેરિયન્ટ ડેલ્ટા વધુ અસર કરી રહ્યો છે.
