સુપ્રીમ કોર્ટે પેગાસસ જાસૂસી કૌભાંડની તપાસ માટે નિષ્ણાતોની સમિતિની રચના કરવાનો નિર્ણય કર્યો છે. સમિતિના તમામ સભ્યોની નિમણુક પણ કોર્ટ કરશે. મુખ્ય ન્યાયાધીશ એન.વી. રમનાએ ઓપન કોર્ટમાં આ અંગે ગુરુવારે જણાવ્યું હતું કે આ સંદર્ભમાં આગામી સપ્તાહે આદેશ આપી શકાય છે. CJI રમનાએ જણાવ્યું હતું કે કેટલાક નિષ્ણાતોએ વ્યક્તિગત કારણોસર સમિતિનો ભાગ બનવામાં અસમર્થતા વ્યક્ત કરી હતી, જેના કારણે આદેશ પસાર કરવામાં વિલંબ થયો હતો. સુપ્રીમ કોર્ટે 13 સપ્ટેમ્બરે આ મામલે પોતાનો વચગાળાનો આદેશ અનામત રાખ્યો હતો.
10 દિવસ પહેલા સુનાવણી દરમિયાન, કેન્દ્ર સરકારે કહ્યું હતું કે તે સોગંદનામું દાખલ કરવા માંગતી નથી. કેન્દ્ર વતી કહેવામાં આવ્યું હતું કે તે રાષ્ટ્રીય સુરક્ષા અને આ મામલે વ્યાપક જાહેર હિતને ધ્યાનમાં રાખીને સોગંદનામું દાખલ કરવા માંગતી નથી. સોલિસિટર જનરલ તુષાર મહેતાએ દલીલ કરી હતી કે આ મામલો રાષ્ટ્રીય સુરક્ષા સાથે સંબંધિત છે અને સોગંદનામા દ્વારા આ બાબતોની વિગતવાર ચર્ચા કરી શકાતી નથી. આ મામલો ન્યાયિક ચર્ચામાં ન આવવો જોઈએ. તેને જાહેર ચર્ચામાં ન લાવવો જોઈએ કારણ કે આ મામલો મોટા જાહેર હિત અને રાષ્ટ્રીય સુરક્ષાનો છે. અમે બાબતને સનસનાટીભરી બનાવવા માંગતા નથી.
