બોલીવૂડમાં એક સમય હતો જ્યારે પરિણીત, ગર્ભવતી અને માતા બની ચુકેલી અભિનેત્રીઓને ખૂબ જ ઓછું કામ મળતું હતું. પરંતુ હવે તે સમયમાં ફેરફાર થતો જોવા મળે છે અને અભિનેત્રીઓને આ ત્રણેય અંગત પરિસ્થિતિમાં કામ મળી રહ્યું છે.
બોલીવૂડમાં બોલ્ડ એન્ડ બ્યૂટીફૂલ તરીકે પોતાની અનોખી છાપ ઊભી કરનાર નેહા ધૂપિયા પણ આ વર્ષે બીજીવાર માતા બનશે. આ સ્થિતિમાં તે ફિલ્મનું શૂટિંગ પણ કરી રહી છે. નેહા ટૂંક સમયમાં જ રોની સ્ક્રુવાલા સાથે ‘અ થર્સ ડે’ ફિલ્મમાં કામ કરતી જોવા મળશે. તેણે ગર્ભાવસ્થા દરમિયાન ફિલ્મનું શૂટિંગ કરવાનું સ્વીકારીને મોટું સાહસ કર્યું છે તેવી ચર્ચા બોલીવૂડમાં થઇ રહી છે. જોકે, કરીના કપૂરે પણ ગત વર્ષે પોતાની ગર્ભાવસ્થા દરમિયાન એક જાહેરાતનું શૂટિંગ કર્યું હતું.
નેહાએ પોતાની નવી ફિલ્મનું ફર્સ્ટ લૂક તાજેતરમાં જાહેર કર્યું હતું. આ ફિલ્મમાં તે ગર્ભવતી મહિલા પોલીસ અધિકારીની ભૂમિકામાં જોવા મળશે. નેહાએ લખ્યું હતું કે, રીલ અને રિઅલ લાઇફ વચ્ચે બ્રિજ બનાવી રહી છું. મને મદદ કરવા બદલ અને મારામાં વિશ્વાસ રાખવા માટે દરેકની આભારી છું. આ ફિલ્મમાં તેનું નામ એસીપી કેથરીન અલ્વારેઝ છે. ફિલ્મમાં એક પ્લે સ્કૂલના બુદ્ધિશાળી શિક્ષકની કથા છે, જે 16 બાળકોને બંધક બનાવે છે. આ થ્રિલર ફિલ્મમાં યામી ગૌતમ, ડિમ્પલ કાપડિયા, અતુલ કુલકર્ણી અને માયા સરાઓ જેવા કલાકારો પણ જોવા મળશે.
