અલ કાયદોના વડા અયમાન અલ ઝવાહિરીનો એક નવો વીડિયો ફરતો થયો છે. અમેરિકામાં 9/11 ત્રાસવાદી હુમલાની 20મી વરસીએ સોસિયલ મીડિયામાં આ વીડિયો દેખાયો છે. ખાસ વાત એ છે કે ગયા વર્ષના ડિસેમ્બરમાં ઝવાહિરીના મોતના અહેવાલ આવ્યા હતાં અને તેમાં જણાવાયું હતું કે આ ત્રાસવાદી ગંભીર રીતે બિમાર હતો અને તેનાથી તેનું મોત થયું છે.
જેહાદી જૂથોની ઓનલાઇન પ્રવૃત્તિઓ પર નજર રાખતી અમેરિકા સ્થિત SITE ઇન્ટેલિજન્સ ગ્રૂપે ઝવાહિરીના નવા વીડિયોની માહિતી આપી હતી. તેમાં જણાવાયું હતું કે ઝવાહિરીએ આ વિડિયોમાં ઘણા મુદ્દા પર વાત કરી હતી. ગ્રૂપના ડિરેક્ટર રીટા કૈજે સોસિયલ મીડિયામાં જણાવ્યું હતું કે ઝવાહિરીના મોત અંગે કેટલાંક અહેવાલ આવ્યા હતા, પરંતુ તે 60 મિનિટના વિડિયોમાં દેખાયો છે. અમારી પાસે સાબિતી છે કે તે હજુ જીવતો છે.
રીટાના જણાવ્યા અનુસાર પહેલી જાન્યુઆરીએ સીરિયામાં રશિયાના મિલિટરી બેઝ પર હુમલો થયો હતો. ઝવાહિરીએ નવા વીડિયોમાં જણાવ્યું છે કે આ હુમલો અલ કાયદાના એક સહયોગી સંગઠન હુરાસ અલે કર્યો હતો. આ વીડિયોના પ્રારંભમાં ઝવાહિરીના રક્ષણની હાકલ કરવામાં આવી છે. વિશેષ વાત એ છે કે તેમાં તાલિબાનની પણ કેટલીક ક્લિપ છે. અફઘાનિસ્તાનમાં તાલિબાનની જીતને અલ કાયદાની જીત દર્શાવવામાં આવી છે.
અલ કાયદાની મીડિયા પાંખે જણાવ્યું હતું કે તે ટૂંક સમયમાં કેટલાંક વધુ વીડિયો અને પુસ્તકો જાહેર કરશે. તેમાંથી એક પુસ્તક ઝવાહિરી લિખિત હશે. ત્રાસવાદી ઘટનાઓ પર નજર રાખતા પશ્ચિમના નિષ્ણાતો માને છે કે તાલિબાન અને અલ કાયદા વચ્ચે ગાઢ સંબંધો છે. અલ કાયદાએ અગાઉ પણ તેના નિવેદનોમાં તેનો ઉલ્લેખ કરેલો છે. ઓસામા બિન લાદેનના મોત બાદ ઝવાહિરીને અલ કાયદાનો વડો બનાવવામાં આવ્યો હતો. જોકે 2001માં અમેરિકાએ આ આતંકી સંગઠનની કેડ ભાગી નાંખી હતી.
