અમદાવાદના શેલા વિસ્તારમાં આર્કસ સ્કાય સીટી બંગલોઝમાં ધાડપાડુઓએ મંગળવારે રાત્રે પરિવારને બાનમાં લઈને લૂંટ કરી હતી. મોડી રાતે 4 લૂંટારુઓ ત્રાટક્યા હતા અને CAના પરિવારને બાનમાં લઈને સોના દાગીના અને લેપટોપ સહિત 1.80 લાખનો મુદ્દામાલ લૂંટીને ફરાર થઈ ગયા હતી. લૂંટની સમગ્ર ઘટના સીસીટીવીમાં કેમેરામાં કેદ થઈ હતી. જેના આધારે પોલીસે ગુનો નોંધીને લૂંટારૂઓની શોધખોળ હાથ ધરી હતી.
પોલીસમાં ફરિયાદ મુજબ પ્રહલાદનગર એચ એન સફળ નામની કંપનીમાં CA તરીકે નોકરી કરતાં મનોજ અગ્રવાલ શેલા ગામની સીમમાં આવેલા આર્કસ સ્કાય સીટી બંગલોઝમાં પરિવાર સાથે રહે છે. 30 ઓગસ્ટે જન્માષ્ટમીનો તહેવાર હોવાથી ઓફિસમાં રજા હતી એટલે મનોજભાઈ પત્ની અને બે દીકરાને ફરવા માટે બહાર લઈ ગયા હતા અને બપોરે તેઓ પરત ઘરે આવી ગયા હતા. સાંજે તેઓ ડિનર કરીને બેડરૂમમાં સૂતા હતા પરંતુ મનોજભાઈ બેડરૂમનો દરવાજો અંદરથી લોક કરવાનો ભૂલી ગયા હતા.આ દરમિયાન રાતે 3 વાગ્યાની આસપાસ લૂંટારૂ ગેંગ તેમના બંગલા પર ત્રાટકી હતી. અવાજ આવતા મનોજભાઈ અને તેમની પત્ની જાગી ગયા અને બંને દીકરાઓ જ્યાં સૂતા હતા ત્યાં જવા લાગ્યા તો સામેથી જ ચાર શખ્સો તેમની સામે આવ્યા અને બોલશો તો જાનથી મારી નાખીશું કહીને હાથમાંથી સોનાની લકી તથા પહેરેલું મંગળસુત્ર, બે બંગડીઓ પણ કાઢી લીધી હતી. પ્રાપ્ત માહિતી મુજબ ચાર લૂંટારૂઓ CAના ઘરેથી 1.80 લાખનો મુદ્દામાલ લૂંટીને ફરાર થયા હતા.
