ક્રાઉન પ્રિન્સ મોહમ્મદ બિન સલમાનના આમંત્રણ પર વડાપ્રધાન નરેન્દ્ર મોદી મંગળવાર, 22 એપ્રિલે બે દિવસની મુલાકાત માટે ઐતિહાસિક શહેર જેદ્દાહ પહોંચ્યા હતાં. વિશેષ સંકેત તરીકે વડાપ્રધાન મોદીનું વિમાન સાઉદી હવાઈ ક્ષેત્રમાં પ્રવેશ્યું ત્યારે રોયલ સાઉદી એરફોર્સના F-15 વિમાનોએ તેનું એસ્કોર્ટ કર્યું હતું. આ પગલાને બંને દેશો વચ્ચે સંરક્ષણ સહયોગને વધુ ગાઢ બનાવવા તરીકે જોવામાં આવી રહ્યું છે.
વડાપ્રધાન નરેન્દ્ર મોદીની જેદ્દાહ મુલાકાત દરમિયાન ભારત અને સાઉદી અરેબિયા વચ્ચે મંગળવારે ઓછામાં ઓછા છ સમજૂતી કરાર (MoU) પર હસ્તાક્ષર થશે. કેટલાંક વધુ કરારને અંતિમ સ્વરૂપ આપવા માટે પણ સોમવાર મોડી રાત સુધી વાટાઘાટો ચાલુ રહી હતી.
વડાપ્રધાન મોદી સાંજે સાઉદી અરેબિયાના ક્રાઉન પ્રિન્સ અને વડાપ્રધાન મોહમ્મદ બિન સલમાન અલ સઉદ સાથેની મુલાકાત દરમિયાન ભારતીય હજયાત્રીઓ માટેના ક્વોટા સહિત હજ સંબંધિત મુદ્દાઓ પર પણ ચર્ચા કરશે.
બંને પક્ષો અવકાશ, ઊર્જા, આરોગ્ય, વિજ્ઞાન અને વૈજ્ઞાનિક સંશોધન, સંસ્કૃતિ અને અદ્યતન ટેકનોલોજીના ક્ષેત્રોમાં કરારો પર હસ્તાક્ષર કરે તેવી અપેક્ષા છે.સૂત્રોએ ઉમેર્યું હતું કે મોદીના આગમનના 24 કલાક પહેલા વધારાના વેપાર, રોકાણ અને સંરક્ષણ કરારો પૂર્ણ કરવા માટે પ્રયાસો ચાલી રહ્યા હતા.
મોદી મંગળવારે બપોરે સાઉદી અરેબિયાના ક્રાઉન પ્રિન્સ મોહમ્મદ બિન સલમાનના આમંત્રણ પર જેદ્દાહ પહોંચશે, જે 40 વર્ષમાં કોઈ ભારતીય વડા પ્રધાનની પ્રથમ જેદ્દાહ મુલાકાત હશે. ભારત અને સાઉદી અરેબિયા વચ્ચે જોડાણની દ્રષ્ટિએ જેદ્દાહ ખૂબ જ મહત્વપૂર્ણ શહેર છે કારણ કે સદીઓથી, જેદ્દાહ બંને દેશો વચ્ચેના વેપાર માટે બંદર હતું અને તે મક્કાનું પ્રવેશદ્વાર પણ છે. તેથી જે કોઈ ઉમરાહ અને હજ માટે આવે છે તે જેદ્દાહમાં ઉતરે છે અને પછી મક્કા જાય છે.
૨૦૨૫ માટે ભારતનો હજ ક્વોટા ૨૦૧૪ના ૧,૩૬,૦૨૦થી વધીને ૧૭૫,૦૨૫ થયો છે, જેમાં ૧,૨૨,૫૧૮ હજયાત્રીઓ માટેની વ્યવસ્થાને અંતિમ સ્વરૂપ આપવામાં આવ્યું છે. આ વર્ષે આશરે ૪૨,૦૦૦ ભારતીયો પવિત્ર હજયાત્રા કરે તેવી શક્યતા ઓછી છે.
વડાપ્રધાન મોદી અને ક્રાઉન પ્રિન્સ દ્વિપક્ષીય સંબંધોને મજબૂત બનાવવા માટે પ્રધાનમંત્રીની 2019ની મુલાકાત દરમિયાન સ્થાપિત વ્યૂહાત્મક ભાગીદારી કાઉન્સિલની બીજી બેઠકનું સહ-અધ્યક્ષતા કરશે.
