અમેરિકાના બોસ્ટનમાં રવિવારે એક કાર્યક્રમમાં કોંગ્રેસ નેતા રાહુલ ગાંધીએ ભારતની ચૂંટણી સિસ્ટમમાં ગોટાળાનો આક્ષેપ કરતાં ભારતમાં રાજકીય ઘમસાણ મચ્યું હતું. રાહુલ ગાંધીએ મહારાષ્ટ્ર વિધાનસભાની ચૂંટણીને ટાંકીને જણાવ્યું હતું કે તે ખૂબ જ સ્પષ્ટ છે કે ચૂંટણી પંચ (EC) સાથે ચેડા થયા છે. તેઓ અગાઉ પણ આ મુદ્દો ઉઠાવતા આવ્યા હતાં. ચૂંટણી સિસ્ટમમાં કંઈક ખોટું છે.
લોકસભામાં વિપક્ષના નેતાએ દાવો કર્યો હતો કે, સરળ શબ્દોમાં કહીએ તો, મહારાષ્ટ્ર વિધાનસભા ચૂંટણીમાં રાજ્યમાં પુખ્ત વયના લોકો કરતાં વધુ લોકોએ મતદાન કર્યું હતું.ચૂંટણી પંચે અમને સાંજે 5:30 વાગ્યાનો મતદાનનો આંકડો આપ્યો હતો, અને સાંજે 5:30થી 7:30 વાગ્યાની વચ્ચે 65 લાખ મતદારોએ મતદાન કર્યું હતું. આવું થવું અશક્ય છે. મતદારને મતદાન કરવા માટે લગભગ ત્રણ મિનિટ લાગે છે, અને જો તમે ગણતરી કરો તો તેનો અર્થ એ થશે કે સવારના 2 વાગ્યા સુધી મતદારોની લાઇનો હતી, પરંતુ આવું થયું ન હતું.
ગયા વર્ષે નવેમ્બરમાં મહારાષ્ટ્રની ચૂંટણીમાં ભાજપ-શિવસેના-એનસીપી ગઠબંધન મહાયુતિએ કોંગ્રેસ, એનસીપી (એસપી) અને શિવસેના (યુબીટી)ના મહા વિકાસ આઘાડી (એમવીએ) ગઠબંધનને હરાવીને રાજ્યમાં સત્તા મેળવી હતી.
અમેરિકામાં ભારતના ચૂંટણી પંચ વિરુદ્ધની કથિત ટિપ્પણી બદલ ભાજપે કોંગ્રેસ નેતા રાહુલ ગાંધીને દેશદ્રોહી ગણાવીને જણાવ્યું હતું કે નેશનલ હેરાલ્ડ કેસમાં એન્ફોર્સમેન્ટ ડિરેક્ટોરેટ (ઇડી)ની કાર્યવાહીનો ગુસ્સો રાહુલ ગાંધી ચૂંટણી પંચ પર ઠાલવી રહ્યાં છે.
ભાજપના રાષ્ટ્રીય પ્રવક્તા સંબિત પાત્રાએ કહ્યું હતું કે તમે એન્ફોર્સમેન્ટ ડિરેક્ટોરેટ (નેશનલ હેરાલ્ડ કેસમાં)ની કાર્યવાહીનો ગુસ્સો ચૂંટણી પંચ પર ઠાલવી રહ્યાં છો. આવું કરવાથી કંઈ થશે નહીં. ED તમને છોડશે નહીં, કારણ કે એજન્સીઓ તથ્યોના આધારે કામ કરે છે અને નેશનલ હેરાલ્ડ મામલો એક સ્પષ્ટ અને ખુલ્લો છે. તમને છોડવામાં આવશે નહીં. તમને અને તમારી માતાને ગુનાની આવક સાથે પકડવામાં આવશે અને જેલમાં મોકલવામાં આવશે.
દિલ્હીમાં પ્રેસ કોન્ફરન્સમાં તેમણે જણાવ્યું હતું કે તમે દેશદ્રોહી છો, ફક્ત એટલા માટે નહીં કે તમે વિદેશી ધરતી પર ભારતીય સંસ્થાઓ અને ભારતીય લોકશાહીનું અપમાન કરો છો, પણ એટલા માટે પણ કે તમે અને તમારી માતાએ નેશનલ હેરાલ્ડ કેસમાં દેશના કરોડો રૂપિયાની ઉચાપત કરી છે. તમે અને તમારી માતા આનાથી બચી શકશો નહીં.
EDએ તાજેતરમાં જ નેશનલ હેરાલ્ડ કેસમાં નવી દિલ્હીની એક ખાસ કોર્ટમાં સોનિયા ગાંધી અને રાહુલ ગાંધી અને અન્ય લોકો વિરુદ્ધ 988 કરોડ રૂપિયાના કથિત લોન્ડરિંગનો આરોપ લગાવીને ચાર્જશીટ દાખલ કરી હતી.
