અમેરિકામાં ટ્રમ્પ એડમિનિસ્ટ્રેશને હાર્વર્ડ યુનિવર્સિટીનું ફેડરલ ભંડોળ અટકાવ્યા પછી હવે એવી ધમકી આપી છે કે જો તે વિદેશી વિદ્યાર્થીઓની ગેરકાયદે અને હિંસક પ્રવૃત્તિઓની વિસ્તૃત માહિતી નહીં આપે તો તેની વિદેશી વિદ્યાર્થીઓને પ્રવેશ આપવાની સત્તા પરત ખેંચી લેવાશે.
ડીપાર્ટમેન્ટ ઓફ હોમલેન્ડ સિક્યુરિટી સેક્રેટરી ક્રિસ્ટી નોએમે તાજેતરમાં એક કડક પત્ર લખીને જણાવ્યું હતું કે, યુનિવર્સિટી 30 એપ્રિલ સુધીમાં તેના કેમ્પસમાં વિદેશી વિદ્યાર્થીઓની ગેરકાયદે અને હિંસક પ્રવૃત્તિઓની તમામ માહિતી રજૂ કરે. જો યુનિવર્સિટી આ માહિતી નહીં આપે તો સ્ટુડન્ટ એન્ડ એક્સચેન્જ વિઝિટર પ્રોગ્રામ (SEVP) પ્રમાણપત્ર ગુમાવવું પડશે. તેમણે જણાવ્યું હતું કે હાર્વર્ડનું મેનેજમેન્ટ યહૂદી વિરોધી પ્રવૃત્તિઓ સામે ઘૂંટણિયે પડી રહ્યું છે. તે ઉગ્રવાદી હિંસાને પ્રોત્સાહન આપે છે અને આપણી રાષ્ટ્રીય સુરક્ષાને જોખમમાં મૂકે છે. તેના કેમ્પસ અને ક્લાસરૂમમાં અમેરિકા વિરોધી અને હમાસ તરફી વિચારધારાનું ઝેર ફેલાવામાં આવે છે અને ઉચ્ચ શિક્ષણની ટોચની સંસ્થા તરીકે હાર્વર્ડનું સ્થાન હવે નીચું ગયું છે. નોએમે યુનિવર્સિટી માટેના 27 લાખ ડોલરની કુલ બે ગ્રાન્ટને રદ કરવાની પણ જાહેરાત કરી હતી. જોકે હાર્વર્ડના પ્રવક્તાએ જણાવ્યું હતું કે યુનિવર્સિટી નોએમના ગ્રાન્ટ રદ કરવા અને વિદેશી વિદ્યાર્થી વિઝાની ચકાસણી અંગેના પત્રથી વાકેફ છે. યુનિવર્સિટી પોતાની સ્વતંત્રતા અને બંધારણીય અધિકારો સાથે સમાધાન ન કરવા માટે મક્કમ છે.
