ઇન્ડિયન પ્રીમિયર લીગ (આઇપીએલ)ની રવિવાર, 6 એપ્રિલે રમાયેલી મેચમાં હૈદરાબાદને સાત વિકેટે પરાજય આપીને ગુજરાત ટાઇટન્સે સતત ત્રીજો વિજય મેળવ્યો હતો. ચાલુ સીઝનમાં હૈદરાબાદની ટીમનો સતત ચોથો પરાજય થયો હતો.
ગુજરાતે ઓલરાઉન્ડ દેખાવ કરતા મેચ એકતરફ બની હતી. સનરાઈઝર્સ હૈદરાબાદે પ્રથમ બેટિંગ કરતાં 20 ઓવરમાં આઠ વિકેટે 152 રન બનાવ્યા હતાં. આ ટાર્ગેટનો પીછો કરતાં સુકાની શુભમન ગિલના અણનમ 61 રન તથા વોશિંગ્ટન સુંદરની 49 રનની ઈનિંગ્સના સહારે ગુજરાતે 16.4 ઓવરમાં જ 153 રનનો લક્ષ્યાંક ત્રણ વિકેટ ગુમાવીને હાંસલ કર્યો હતો. મોહમ્મદ સિરાઝે ચાર ઓવરમાં 17 રન આપીને ચાર વિકેટ ઝડપતા તે મેન ઓફ ધ મેચ બન્યો હતો.
ગુજરાત ટાઈટન્સનો ઈમ્પેક્ટ પ્લેયર શેરફાને રૂધરફોર્ડ 16 બોલમાં છ ચોગ્ગા અને એક છગ્ગા સાથે 35 રન કરી નોટઆઉટ રહ્યો હતો. તેને અભિષેક શર્માની એક જ ઓવરમાં ચાર ચોગ્ગા ફટકાર્યા હતા. જ્યારે ઈનિંગ્સની 17મી ઓવર ફેંકવા આવેલા હૈદરાબાદના કેપ્ટન પેટ કમિન્સના પ્રથમ બે બોલમાં છગ્ગો અને ચોગ્ગો ફટકારીને ટાઈટન્સને જીતની નજીક લઈ ગયો હતો.
હૈદરાબાદના સરળ ટારગેટનો પીછો ગુજરાત ટાઇટન્સની ટીમ ડાબોડી ઓપનર સાઈ સુદર્શન (5) અને ત્રીજા ક્રમના બેટ્સમેન જોઝ બટલર (0)ની ઝડપતી વિકેટ ગુમાવી હતી. શમીએ ત્રીજી ઓવરમાં પાંચમાં બોલ પર સાઈ સુદર્શનને અનિકેતના હાથે કેચ આઉટ કરાવીને હૈદરાબાદને પ્રથમ સફળતા અપાવી હતી. આ પછી પેટ કમિન્સની ઓવરમાં બટલર બોલને ફટકારવા જતા વિકેટ પાછળ ઝડપાયો હતો. શુભમન ગિલે એક છેડો સંભાળી રાખ્યો હતો અને તેણે 43 બોલમાં 61 રન કર્યા હતા જેમાં નવ ચોગ્ગાન સમાવેશ થયો હતો. વોશિંગ્ટન સુંદરે તેનો સાથ આપ્યો હતો અને 29 બોલમાં પાંચ ચોગ્ગા તથા બે છગ્ગાની મદદથી 49 રન ફટકાર્યા હતા. બંને વચ્ચે ત્રીજી વિકેટ માટે 90 રનની ભાગીદારી થઈ હતી.
શેરફાને રૂધરફોર્ડે બાદમાં 16 બોલમાં તોફાની 35 રન કર્યા હતા અને તે નોટઆઉટ રહ્યો હતો. ગિલ સાથે ચોથી વિકેટ માટે તેણે અણનમ 47 રન જોડ્યા હતા અને બંને પ્લેયર્સ ગુજરાતને જીત તરફ દોરી ગયા હતા.ગત સિઝનમાં ઝંઝાવાતી બેટિંગ માટે જાણીતી હૈદરાબાદની ટીમ આ સિઝનમાં તેની પ્રારંભિક મેચને બાદ કરતા બેટિંગમાં પ્રભાવી દેખાવ કરી શકી નથી.
