બોલીવૂડના એક સમયના ચોકલેટી હીરો આમિર ખાન ફરીથી ચર્ચામાં છે. તાજેતરમાં તેમણે પોતાના 60મા જન્મદિવસની ઉજવણી પહેલાં પોતાની નવી પાર્ટનર ગૌરી સ્પ્રાટનો મીડિયાને પરિચય કરાવીને સમગ્ર દેશને ચોંકાવી દીધો છે. આમિરનું આ પગલું તેનાં અંગત જીવન માટે ઘણું મહત્વનું ગણાય છે, કારણ કે તેણે ગૌરી સાથે પોતાના સંબંધ અને ભવિષ્યના આયોજનો વિશે ખુલીને વાત કરી હતી. તેઓ લગભગ છેલ્લાં એક વર્ષથી એકબીજાને ડેટ કરી રહ્યાં છે.
આમિર અને ગૌરી 25 વર્ષ પહેલાં પહેલી વખત મળ્યાં હતાં, પરંતુ પછી બંને વ્યસ્ત જીવનને કારણે સંપર્કમાં નહોતા. હવે તેઓ બે વર્ષ પહેલાં ફરીથી સંપર્કમાં આવ્યાં છે, તેઓ મળ્યાં અને તેમનો સંબંધ વિકસ્યો. આમિરે ગૌરી પ્રત્યેની પોતાની લાગણી વ્યક્ત કરતા કહ્યું, “હું કોઈ એવી વ્યક્તિની શોધમાં હતો, જેની સાથે મને શાંતિનો અનુભવ થાય, જે મને શાંતિ આપી શકે. ત્યાં મને એ મળી ગઈ.”
પોતાનો સંબંધ જાહેર કરવા અંગે આમિરે કહ્યું, “હવે અમે બંને એકબીજા સાથે કમિટેડ છીએ અને અમને બંનેને હવે આ સંબંધ જાહેર કરવામાં કોઈ અસુરક્ષાનો ભય નથી. આ જ સારું છે, હવે મારે લોકોથી કંઇ છુપાવવું નહીં પડે. હવે હું જો કાલે એની સાથે કોફી માટે જઉં તો તમે પણ સાથે આવી શકો.”
અત્રે ઉલ્લેખનીય છે કે, આમીર આ પહેલાં બે લગ્ન કર્યા છે, પ્રથમ રીના દત્તા અને પછી કિરણ રાવ સાથે. આ બંને પત્ની દ્વારા તેમને ત્રણ બાળકો પણ છે. ત્યારે હવે ગૌરી સાથે લગ્ન બાબતે આમિરે કહ્યું, “અમે એકબીજાને સંપૂર્ણ સમર્પિત છીએ. હું બે વખત લગ્ન કરી ચૂક્યો છું. પરંતુ હવે 60 વર્ષની ઉંમરે લગ્ન કદાચ મને શોભશે નહીં. પરંતુ જોઈએ.”
ગૌરી સ્પ્રાટે અન્ય એક ઇન્ટરવ્યુમાં કહ્યું હતું કે આમીરના પરિવારે તેનું ભાવભર્યું સ્વાગત કર્યું હતું. તેણે કહ્યું,“તેઓ મને દિલ ખોલીને મળ્યા છે. મને માનપૂર્વક સ્વીકારવામાં આવી છે.” ગૌરીનો અનુભવ હકારાત્મક રહ્યો છે, પરિવારે તેને સ્વીકારી લીધી છે. આમીરના પરિવાર તરફથી મળેલી હુંફ અને લાગણીથી ગૌરી માટે તેમના પરિવારનો ભાગ હોવાનો અનુભવ સારો રહ્યો છે.
ગૌરી સ્પ્રાટ બેંગલુરુની છે અને તેને પણ છ વર્ષનું બાળક છે. તે એક જાણીતી સલૂન બ્રાન્ડમાં 2007થી પાર્ટનર અને ડિરેક્ટર છે. તેણે લંડનની યુનિવર્સિટી ઓફ આર્ટ્સમાંથી ફેશન, સ્ટાઇલિંગ અને ફોટોગ્રાફીની ડિગ્રી મેળવી છે. તે પોતાનું જીવન અંગત રાખવામાં માને છે, તેથી આમીરે ફોટોગ્રાફર્સને પણ તેના ફોટો પબ્લિશ ન કરવા વિનંતી કરી હતી. ગૌરી માટે આમીરે પ્રાઇવેટ સિક્યુરિટી એજન્સી પણ રાખી છે.
