ભારતનાં નાણા પ્રધાન નિર્મલા સીતારમણ શનિવારે સંસદમાં સતત આઠમીવાર બજેટ રજૂ કરીને રેકોર્ડ સ્થાપિત કર્યો હતો. દરેક બજેટ સ્પીચ ખૂબ જ મહત્ત્વપૂર્ણ હોય છે. ભારતના ઈતિહાસના સૌથી લાંબા અને ટૂંકા બજેટ ભાષણો પર એક નજર કરીએ. 2020માં નિર્મલા સીતારમણે દેશના ઇતિહાસમાં સૌથી લાંબુ બજેટ ભાષણ રજૂ કરીને તમામ રેકોર્ડ તોડ્યા હતા. નાણાકીય વર્ષ 2020-21 માટે તેમનું બજેટ ભાષણ 2 કલાક 42 મિનિટ સુધી ચાલ્યું હતું. જોકે આ ભાષણ દરમ્યાન તેઓ અસ્વસ્થતા અનુભવતા અંતે બજેટ ભાષણના છેલ્લા બે પાના વાંચવા માટે લોકસભાના અધ્યક્ષ ઓમ બિરલાએ આગળ આવવું પડ્યું હતું. વર્ષ 2020માં, સીતારમણે વર્ષ 2019માં બજેટ ભાષણ રજૂ કરવાનો 2 કલાક 19 મિનિટનો પોતાનો જ રેકૉર્ડ તોડ્યો હતો. નિર્મલા સીતારમણ પહેલા જસવંત સિંહ દ્વારા વર્ષ 2003માં સૌથી લાંબુ બજેટ ભાષણ આપવામાં આવ્યું હતું, જે 2 કલાક 13 મિનિટ ચાલ્યું હતું. અરુણ જેટલીનું વર્ષ 2014નું બજેટ ભાષણ 2 કલાક 10 મિનિટનું હતું.
1977ના વર્ષમાં અત્યાર સુધીનું સૌથી ટૂંકું બજેટ ભાષણ તત્કાલિન નાણા પ્રધાન હીરુભાઈ મૂળજીભાઈ (એચ.એમ) પટેલે આપ્યું હતું. 1977ના તેમના વચગાળાના બજેટ ભાષણમાં માત્ર 800 શબ્દો હતા. વર્ષ 1991માં શબ્દો મુજબ સૌથી લાંબુ બજેટ ભાષણ આપવાનો રેકોર્ડ તત્કાલિન નાણા પ્રધાન ડો. મનમોહન સિંઘના નામે હતો. તે વર્ષે તેમનું બજેટ ભાષણ 18,650 શબ્દોનું હતું. પી.વી. નરસિમ્હા રાવની સરકારમાં મનમોહન સિંઘે ઉદારીકરણને પ્રોત્સાહન આપતા વર્ષ 1991માં ભારતનું સૌથી મહત્ત્વપૂર્ણ બજેટ રજૂ કર્યું હતું.
