અમેરિકાના પ્રમુખ ડોનાલ્ડ ટ્રમ્પે ઇન્ડિયન-અમેરિકનપત્રકાર કુશ દેસાઈની ડેપ્યુટી પ્રેસ સેક્રેટરી તરીકે નિમણૂક કરી હોવાની વ્હાઇટ હાઉસે શનિવાર, 25 જાન્યુઆરીએ જાહેરાત કરી હતી. કુશ દેસાઈ ગુજરાતના દાહોદ જિલ્લાના ઝાલોદ શહેરના મૂળ વતની છે.
કુશ દેસાઈએ 2024ના ‘રિપબ્લિકન નેશનલ કન્વેન્શન’ માટે ડેપ્યુટી કોમ્યુનિકેશન ડાયરેક્ટર અને ‘રિપબ્લિકન પાર્ટી ઑફ આયોવા’ માટે કોમ્યુનિકેશન ડાયરેક્ટર તરીકે સેવા આપી હતી. તેમણે ‘રિપબ્લિકન નેશનલ કમિટી’માં ડેપ્યુટી બેટલગ્રાઉન્ડ સ્ટેટ્સ અને પેન્સિલવેનિયા કોમ્યુનિકેશન ડાયરેક્ટર તરીકે પણ સેવા આપી હતી. ટ્રમ્પનો તમામ સાત બેટલગ્રાઉન્ડ રાજ્યોમાં વિજય થયો હતો.
રિપબ્લિકન નેશનલ કમિટીમાં રિસર્ચ એનાલિસ્ટ તરીકે જોડાતા પહેલા તેમણે વોશિંગ્ટન ખાતે આવેલી ‘ધી ડેઈલી કોલર’ નામની ન્યૂઝ વેબસાઈટમાં 10 મહિના સુધી પત્રકાર તરીકે કામ કર્યું હતું.
કુશ દેસાઈએ હેનોવર, ન્યુ હેમ્પશાયરમાં આવેલી ‘ડાર્ટમાઉથ કૉલેજ’ નામની ખાનગી આઇવી લીગ સંશોધન યુનિવર્સિટીમાંથી બેચલર ઑફ આર્ટસની ડિગ્રી મેળવી હતી. તેમને જેમ્સ ઓ. ફ્રીડમેન પ્રેસિડેન્શિયલ રિસર્ચ સ્કોલરશિપ એનાયત કરવામાં આવી હતી. આ એક એવો પ્રોગ્રામ છે જે વિદ્યાર્થીઓને ડાર્ટમાઉથ ફેકલ્ટી સાથે કામ કરીને સંશોધનનો અનુભવ મેળવવાની તક આપે છે.
