બોલીવૂડમાં ઘણી એવી ઘણી ફિલ્મો અને વેબસીરીઝ છે જે કોઈને કોઈ કારણસર ગત વર્ષે અટકી ગઈ હતી અથવા નિર્ધારિત સમયે પ્રદર્શિત થઈ શકી નહોતી. તેની રીલીઝમાં વિલંબ થયા પછી તેને નિહાળવા માટે દર્શકોમાં તેની આતુરતા વધી હતી. હવે આ અટવાયેલી ફિલ્મો અને સિરીઝ નવા વર્ષમાં જોવા મળે તેવી અપેક્ષા છે. તેમાં જેની સૌથી વધુ રાહ જોવામાં આવી રહી છે તેવી બોબી દેઓલ અભિનિત બહુચર્ચિત વેબસીરિઝ- ‘આશ્રમ – સીઝન 4’, એમએક્સ પ્લેયર પર રિલીઝ થશે. આ ઉપરાંત કંગના રણોત દ્વારા લિખિત, અભિનિત અને દિગ્દર્શિત ‘ઇમરજન્સી’ ફિલ્મ પણ ટૂંક સમયમાં રીલીઝ થઇ રહી છે. આ ફિલ્મ ખૂબ જ ચર્ચામાં રહી છે.
આશ્રમ 4
ડિજિટલ પ્લેટફોર્મમાં બોબી દેઓલને નવી ઓળખ આપનાર અને તેની કારકિર્દીનો નવો અધ્યાય શરૂ કરનાર વેબસીરીઝ ‘આશ્રમ’ની આ અગાઉ ત્રણ સીઝનને દર્શકો માણી ચૂક્યા છે. બોબીની કારકિર્દીને બાબા નિરાલાની ભૂમિકાએ જ નવજીવન આપ્યું છે. આ શોની ચોથી સીઝન 2023માં રિલીઝ કરવાનું આયોજન હતું, પરંતુ કમનસીબે તેમાં વિલંબ થયો હતો. હવે થોડાં સમયથી એવું જાણવા મળી રહ્યું છે કે, આ સીરીઝની ચોથી સીઝન નવા વર્ષમાં પ્રદર્શિત થશે.
ઇમરજન્સી
કંગના રણોતની બહુચર્ચિત ફિલ્મ ‘ઇમરજન્સી’ની ઘણી ચર્ચાઓ અને વિવાદ પછી સેન્સર બોર્ડ તરફથી મંજુરી મળી ગઈ છે. આ ફિલ્મ 17 જાન્યુઆરીએ થિએટરમાં રિલીઝ થઈ રહી છે. આ એક એવી ફિલ્મ છે જે દેશનાં એકમાત્ર મહિલા વડાંપ્રધાન ઇન્દિરા ગાંધીના જીવન-કવન, ‘ઇમરજન્સી’ની ઘટના અને ભારતીય રાજકારણ પર તેમના પ્રભાવ પર આધારિત છે.
પાતાલ લોક 2
‘પાતાલ લોક’ એવી સીરીઝ છે, જેના દ્વારા જયદીપ અહલાવતને કલાકાર તરીકેની ઓળખ મળી હતી. આ ઉપરાંત અભિષેક બેનર્જીએ પણ એક કાસ્ટિંગ ડાયરેક્ટરમાંથી એક સબળ અભિનેતા તરીકે લોકોમાં પોતાની શાખ ઊભી કરી હતી. પ્રાઇમ વીડિયો દ્વારા તાજેતરમાં આ સિરીઝની નવી સીઝનની જાહેરાત કરવામાં આવી છે. જેમાં જયદીપ અહલાવત ઇન્સ્પેક્ટર હાથીરામ ચૌધરીની ભૂમિકામાં જોવા મળશે. જૂના કલાકારો ઉપરાંત આ સીઝનમાં ઇશ્વાક સિંઘ પણ હશે, જે ઇમરાન અંસારીનું પાત્ર ભજવશે. ‘પાતાલ લોક’ની બીજી સીઝન 17 જાન્યુઆરીએ પ્રાઇમ વીડિયો પર રિલીઝ થશે તેવું કહેવાય છે.
ધ સાબરમતી રીપોર્ટ
વિક્રાંત મેસ્સીની નવી ફિલ્મ ધ સાબરમતી રીપોર્ટ ગત વર્ષે 15 નવેમ્બરે થિએટરમાં રિલીઝ થઈ હતી. આ ફિલ્મ બોક્સ ઓફિસ પર ખાસ સફળ થઇ શકી નહોતી. 2002માં ગોધરામાં ટ્રેનમાં આગની ઘટના પર આધારિત આ ફિલ્મ હવે ડિજિટલ પ્લેટફોર્મ પર રિલીઝ થશે.
