આમિર ખાનની યાદગાર ફિલ્મોમાં ‘તારેં જમીન પર’નો અચૂક સમાવેશ થાય છે. બાળકની મૂંઝવણનો ઉકેલ લાવતા શિક્ષકની ભૂમિકા આમિર ખાને ભજવી હતી. સ્કૂલના માહોલ અને પરિવારની માનસિકતા અંગે મેસેજ આપતી આ ફિલ્મ ખૂબ સફળ રહી હતી.
16 વર્ષ બાદ આમિર ખાન અને ‘તારેં જમીન પર’માં બાળકનો રોલ કરનારા દર્શિલ સફારી ફરીથી સાથે આવી રહ્યા છે. બંનેના લૂકમાં વીતેલા વર્ષોની અસર જોવા મળે છે, જેના કારણે આ ફિલ્મની સીક્વલ ‘સિતારે જમીન પર’ માટે તૈયારીઓ શરૂ થઈ હોવાનું મનાય છે. દર્શિલ સફારીએ તાજેતરમાં તેના સોશિયલ મીડિયામાં આમિર ખાન સાથેનો ફોટોગ્રાફ શેર કર્યો છે. જેમાં ‘તારેં જમીન પર’નો એક સીન તથા વૃદ્ધ આમિર અને યુવાન દર્શિલ જોવા મળે છે.
દર્શિલે કેપ્શનમાં જણાવ્યુ હતું કે, 16 વર્ષ બાદ ફરી ભેગા થયાં છીએ. થોડા મહિના પહેલા આમિર ખાને 2007માં રિલીઝ થયેલી ‘તારેં જમીન પર’ને યાદ કરી હતી, જેને ‘સિતારે જમીન પર’ ટાઈટલ સાથે બનાવવાની ઈચ્છા વ્યક્ત કરી હતી. જૂની ફિલ્મના વિષયને યથાવત રાખીને આગળ વધવા આમિરે તૈયારી દર્શાવી હતી. આમિર ખાનની આ જાહેરાત બાદ સીક્વલ અંગે નક્કર પ્રગતિ થઈ ન હતી, પરંતુ દર્શિલ સફારીની આ પોસ્ટ બાદ આમિરે પણ સીક્વલ ફિલ્મના આ દોરમાં ઝંપલાવવા તૈયારી શરૂ કરી હોય તેમ જણાય છે.
