યુકેની આરોગ્યસંભાળ પ્રણાલીમાં સ્ટાફની ઉણપને પહોંચી વળવા માટે, નેશનલ હેલ્થ સર્વિસ (NHS) એ ભારત સાથે એક નવો વર્કફોર્સ કરાર કર્યો છે જે અંતર્ગત ભારતમાંથી 2,000 ડોકટરોને ફાસ્ટ-ટ્રેક ધોરણે ભાડે રાખવાની યોજના અમલમાં મૂકનાર છે. દેશ ડોકટરોની અછત, ઓછા વેતન, મોંઘી તાલીમ અને ભારે કામના બોજને કારણે NHS દબાણયુક્ત સમસ્યાનો સામનો કરી રહ્યો છે.
જાણવા મળ્યું છે કે NHS એ ડોકટરોની પ્રથમ બેચ માટે પોસ્ટગ્રેજ્યુએટ તાલીમ આપવા માટે મુંબઈ, બેંગલોર, નાગપુર, દિલ્હી, ગુરુગ્રામ, ઈન્દોર, મૈસુર, ચેન્નાઈ અને કાલિકટ જેવા ઘણા ભારતીય શહેરોમાં તાલીમ કેન્દ્રો સ્થાપ્યા છે. તેમની તાલીમનો સમયગાળો 6 થી 12 મહિનાનો હોય છે અને તે પછી આ ડોકટરોને સમગ્ર બ્રિટનની હોસ્પિટલોમાં તૈનાત કરવામાં આવશે. તેમને પ્રોફેશનલ એન્ડ લિંગ્વીસ્ટીક એસેસમેન્ટ બોર્ડ (PLAB) પરીક્ષામાંથી પણ મુક્તિ આપવામાં આવશે જે આ દેશમાં પ્રેક્ટિસ કરવા માટે ફરજિયાત છે.
2021ના બ્રિટિશ મેડિકલ એસોસિએશન (BMA)ના અહેવાલ મુજબ, NHS 49,000 ફૂલ ટાઇમ ડૉક્ટરો અને તબીબી સ્ટાફની અછતનો સામનો કરી રહ્યું હતું. ક્રોનિક સ્ટાફની અછતને કારણે આરોગ્ય સેવા આંતરરાષ્ટ્રીય ભરતી પર અત્યંત નિર્ભર બની ગઈ છે. હાલમાં, વિદેશમાં પ્રશિક્ષિત ડોકટરોની સંખ્યા NHSના તબીબી કર્મચારીઓના 25-30 ટકા જેટલી છે.
NHS વેલ્સમાં ભારતના કેરળ રાજ્યમાંથી 250 નર્સો અને ડોકટરોની ભરતી થવાની છે.
