લંડનના ડેપ્યુટી મેયર રાજેશ અગ્રવાલની શનિવાર તા. 18ના રોજ બેલગ્રેવ નેબરહુડ સેન્ટરમાં યોજાયેલા હસ્ટિંગ્સમાં લેસ્ટર ઈસ્ટ સંસદીય બેઠકના લેબર ઉમેદવાર તરીકે પસંદગી કરવામાં આવી છે. ગયા વર્ષે ઉત્પીડન માટે દોષી ઠેરવવામાં આવ્યા બાદ લેબર પક્ષમાંથી હાંકી કાઢવામાં આવેલા ક્લાઉડીયા વેબ્બના અનુગામી બનશે.
રાજેશ અગ્રવાલે જણાવ્યું હતું કે “લેસ્ટર ઇસ્ટને ફરીથી સેટ કરવાનો સમય આવી ગયો છે. લેસ્ટર ઇસ્ટ માટે લેબર પાર્ટીના સંસદીય ઉમેદવાર તરીકે પસંદ થવા બદલ હું ગૌરવ અનુભવું છું. લેસ્ટર ઇસ્ટને રીસેટ કરવા માટે આ શુભ ક્ષણનો ઉપયોગ કરવાનો સમય છે.‘’
તેમના પ્રચાર નિવેદનમાં, અગ્રવાલે જણાવ્યું હતું કે ‘’ આ મતવિસ્તારને તેમના જેવા સાંસદની જરૂર છે જે વ્યવસાય તરફી અને કામદાર તરફી હોય અને જે પ્રાદેશિક સાંસ્કૃતિક, આર્થિક અને ધાર્મિક તફાવતોને દૂર કરવા માંગતા હોય જે આપણને સરળતાથી વિભાજિત કરી શકે છે. હું ઉદ્યોગસાહસિકતા અને તક વિશે ઉત્સાહી છું. હું માનું છું કે આપણી અર્થવ્યવસ્થાને વધારવા માટે લેબર જ એક માર્ગ છે; જે એક કામદાર તરફી અને પ્રો-એમ્પ્લોયર પણ છે. બિઝનેસ માટે મેં લંડનના ડેપ્યુટી મેયર તરીકે સેંકડો નોકરીઓનું સર્જન કરવામાં અને 255,000 થી વધુ લોકોને વધુ સારી રોજગારીની સ્થિતિ પ્રદાન કરવામાં સફળતા મેળવી છે. હું લેસ્ટર ઇસ્ટમાં સમાન સફળતાઓ લાવીશ અને ખાતરી કરીશ કે તેને તેનો યોગ્ય હિસ્સો મળે.”
શહેરના લેબર મેયર સર પીટર સોલ્સબી માને છે કે બંને ભૂતપૂર્વ લેબર સાંસદો કિથ વાઝ અને ક્લાઉડિયા વેબ્બ લેબરના સત્તાવાર ઉમેદવાર સામે ઊભા રહેશે, જે મતનું વિભાજન કરી શકે છે અને આ બેઠક ટોરીઝને સોંપી શકે છે.
દેશની સૌથી મોટી દક્ષિણ એશિયાઈ વસ્તી ધરાવતી આ બેઠક 1987થી લેબરના હાથમાં છે અને ગયા વર્ષે, હિંદુ અને મુસ્લિમ યુવાનો વચ્ચેની અથડામણ બાદ આ શહેરે વિશ્વભરનું ધ્યાન ખેંચ્યું હતું.
