અમેરિકામાં ટાપુ રાજ્ય હવાઈના માઉઇ ટાપુમાં ફાટી નીકળેલા દાવાનળનો મૃત્યુઆંક ગુરુવારે વધીને 55 થયો હતો. ગુરુવારે અન્ય 17 જાનહાનિની પુષ્ટિ કરવામાં આવી હતી. આ ટાપુ પર બીજા 1000 લોકો હજુ પણ લાપતા હતા, તેથી મૃત્યુઆંકમાં વધારો થવાની ધારણા છે. માઉઇના મેયર રિચાર્ડ બિસેને જણાવ્યું હતું કે ઐતિહાસિક નગર સંપૂર્ણપણે લુપ્ત થઈ ગયું છે.
હવાઇના ગવર્નર જોશ ગ્રીને ગુરુવારે સાંજે જણાવ્યું હતું કે લગભગ 1,000 લોકો હજુ પણ લાપતા છે, કારણ કે તેમણે કહ્યું હતું કે અલોહા રાજ્ય રાજ્યના ઇતિહાસમાં તેની સૌથી ભયંકર આપત્તિ તરફ આગળ વધી રહ્યું છે.
માઉઇ કાઉન્ટીએ જણાવ્યા પ્રમાણે દક્ષિણમાંથી પસાર થતા વાવાઝોડા ડોરાને કારણે જંગલમાં આગ ફાટી નીકળી હતી, જેણે ઘણી કારને પોતાની ઝપટમાં લઈ લીધી હતી અને કેટલીક ઐતિહાસિક ઇમારતોને કાટમાળના ઢગલામાં ફેરવી દીધી હતી. આખી રાત આગની વિકરાળ જ્વાળાઓ ભભૂકતી રહી હતી, જેના કારણે બાળકો અને પુખ્ત વયના લોકોને તેમના જીવન બચાવવા માટે દરિયા તરફ દોડી જવાની ફરજ પડી હતી.
આગને કારણે લહૈના ટાઉનમાં ઘરો, કાર અને ઈમારતો બળીને ખાખ થઈ ગઈ હતી. મુલાકાતીઓએ માઉઇ ટાપુ છોડવાનો આદેશ અપાયો હતો. તેઓ એરપોર્ટ પર ફસાયેલા જોવા મળ્યા હતા. હવાઈ ઇમરજન્સી મેનેજમેન્ટ એજન્સીએ એક નિવેદનમાં જણાવ્યું હતું કે આગ 8 ઓગસ્ટે લાગી હતી અને પછી ફેલાઈ હતી. જેમાં હજારો એકર જમીન સળગી ગઈ હતી અને ટાપુના પર ઘરો, વ્યવસાયો અને 35,000 લોકોના જીવન જોખમમાં મૂકાયા હતાં.
અમેરિકી પ્રેસિડન્ટ જો બાઇડેને બુધવારે કહ્યું હતું કે તેમણે હવાઈના માઉઇ ટાપુ પર જંગલમાં લાગેલી આગનો સામનો કરવા માટે ‘તમામ ઉપલબ્ધ સરકારી સંસાધનો’નો ઉપયોગ કરવાનો આદેશ આપ્યો છે. કોસ્ટ ગાર્ડ અને નેવી પણ બચાવ કાર્યમાં મદદ કરી રહ્યા છે.આગનો સામનો કરવા માટે નૌકાદળ દ્વારા બ્લેક હૉક હેલિકોપ્ટર ફાળવવામાં આવ્યા છે, જ્યારે હવાઈ નેશનલ ગાર્ડે ચિનૂક હેલિકોપ્ટરને અગ્નિશામક અને શોધ તથા બચાવ કામગીરી માટે તૈનાત કર્યા છે. પ્રમુખ જો બાઇડેને કહ્યું હતું કે પરિવહન વિભાગ ટાપુ પર ફસાયેલા પ્રવાસીઓને બહાર કાઢવા માટે કોમર્શિયલ એરલાઇન્સ સાથે કામ કરી રહ્યું છે. તે જ સમયે, આંતરિક અને કૃષિ વિભાગો આગ કાબૂમાં આવી ગયા પછી રાહતના પ્રયાસોમાં મદદ કરવા માટે તૈયાર છે.
