ભાવનગરમાં વિદેશી નાગરિકોનો ડેટા ઓનલાઈન મેળવી તેમની લોન મંજુર થઈ હોવાનો એસએમએસ તેમજ ઇ-મેઈલ મોકલી લોન પ્રોસેસના નામે ગિફ્ટ કાર્ડ મેળવી છેતરપિંડી અને વિશ્વાસઘાત કરતા ત્રણ વ્યક્તિની પોલીસે ધરપકડ કરી હતી.
પોલીસને બાતમી મળી હતી કે, ભાવનગરના ઘોઘારોડ, તરસમીયા નજીક આવેલી કૈલાશ સોસાયટીમાં રહેતો નિકુંજ ઘનશ્યામભાઈ ચૌહાણ અમેરિકા તેમજ અન્ય દેશના નાગરિકોનો લીડ ડેટા કોઈપણ રીતે મેળવીને કૌભાંડ આચરી રહ્યો છે. જેમાં તે વિદેશી નાગરિકોના નામ સરનામા મોબાઈલ નંબર સહિતનો ડેટા તેના મળતીયા માણસોને આપી દે છે, એ લીડ ડેટાનો ઉપયોગ કરી વિદેશી નાગરિકો સાથે જુદી જુદી પ્રોસેસના બહાને તેના મળતીયા માણસોને પોતાના ઘરે બોલાવી છેતરપિંડી અને વિશ્વાસઘાત કરે છે. આ બાતમીના આધારે પોલીસે સંયુક્ત ઓપરેશન હાથ ધરી તરસમિયા ગામમાં આવેલી કૈલાશ સોસાયટીમાં મોડી રાત્રે દરોડો પાડી નિકુંજ ઘનશ્યામભાઈ ચૌહાણ (રહે. કૈલાસ સોસાયટી, તરસમિયા- ઘોઘારોડ), મયુર રાજેશભાઈ રાઠોડ (રહે પ્લોટ નં.192/બી, પચાસ વારિયા, સરદારનગર) અને કૃણાલ ભુપતભાઈ પરમાર (રહે પ્લોટ નં.567, સોમનાથ રેસીડેન્સી, યોગીનગર)ને ઝડપી દીધા હતા.
