‘હેરોલ્ડ એન્ડ કુમાર’ ફિલ્મ ફ્રેન્ચાઇઝી અને ‘ડેઝિગ્નેટેડ સર્વાઇવર’ સિરિઝ માટે જાણીતા ભારતીય મૂળના અમેરિકન અભિનેતા કાલ પેને તાજેતરમાં લોકપ્રિય હિન્દી ટીવી સિરિયલ ‘તારક મહેતા કા ઉલ્ટા ચશ્મા’ના સેટની મુલાકાત લીધી હતી અને તેઓ સિરિયલના કલાકારોને મળ્યાં હતા.
પેનનું અસલી નામ કલ્પેન સુરેશ મોદી છે. તેમણે મુંબઈમાં તેમની ઓન-લોકેશન વિઝિટના ફોટો સોશિયલ મીડિયામાં શેર કર્યા હતા. અભિનેતાએ રવિવારે ઇન્સ્ટાગ્રામ પર પોસ્ટને લખ્યું હતું કે ગોકુલધામ સોસાયટીમાં નવા મિત્રોને મળ્યો. સેટ પરની મુલાકાત માટે અસિત કુમાર મોદી અને તારક મહેતા કા ઉલ્ટા ચશ્મા ફેમનો આભાર. તસવીરોમાં, પેન શોના નિર્માતા અસિત કુમાર મોદી તેમજ કલાકારો દિલીપ જોશી, સુનયના ફોજદાર, મંદાર ચાંદવાડકર, અંબિકા રંજનકર, મુનમુન દત્તા, મોનાઝ મેવાવાલા, શ્યામ પાઠક, કિરણ ભટ્ટ, તન્મય વેકરિયા અને બલવિંદર સિંહ સુરી સાથે પોઝ આપતા જોવા મળે છે.
