સ્વિસ એર ક્વોલિટી ટેક્નોલોજી કંપનીએ તાજેતરમાં IQAirના ‘વર્લ્ડ એર ક્વોલિટી રિપોર્ટ 2024’ રજૂ કર્યો હતો. જેમાં વિશ્વના 20 સૌથી પ્રદૂષિત શહેરોમાંથી 13 ભારતમાં છે. મેઘાલયનું બર્નિહાટ આ યાદીમાં ટોચ પર છે. જ્યારે દિલ્હી આજે પણ વિશ્વની સૌથી પ્રદૂષિત પાટનગરનું બિરુદ ધરાવે છે.
IQ એર રિપોર્ટ 2024ના પ્રમાણે ભારત વિશ્વના સૌથી પ્રદૂષિત દેશોમાં પાંચમા ક્રમે આવ્યું છે. નોંધનીય બાબત છે કે, દેશના સૌથી પ્રદૂષિત શહેરોની યાદીમાં દિલ્હી કે નોઈડા નહીં પરંતુ મેઘાલયનું બર્નિહાટ છે. જ્યારે દિલ્હી વિશ્વના સૌથી પ્રદૂષિત પાટનગરનું સ્થાન ધરાવે છે. ઉલ્લેખનીય છે કે, વિશ્વના 20 પ્રદૂષિત શહેરોમાં બર્નિહાટ (મેઘાલય), દિલ્હી, મુલ્લાનપુર (પંજાબ), ફરીદાબાદ (હરિયાણા), લોની (ગાઝિયાબાદ), નવી દિલ્હી (દિલ્હી), ગુરુગ્રામ (હરિયાણા), ગંગાનગર (રાજસ્થાન), ગ્રેટર નોઈડા (ઉત્તર પ્રદેશ), ભીવંડી (રાજસ્થાન), મુઝફ્ફરનગર (ઉત્તર પ્રદેશ), હનુમાનગઢ (રાજસ્થાન), નોઈડા (ઉત્તર પ્રદેશ)નો સમાવેશ થાય છે. વર્ષ 2023માં ભારત આ યાદીમાં ત્રીજા નંબરે હતું. દિલ્હી આખા વર્ષ દરમિયાન ગંભીર વાયુ પ્રદૂષણની સમસ્યાનો સામનો કરે છે અને શિયાળામાં તે વધુ ખરાબ બને છે, જ્યારે પ્રતિકૂળ હવામાન પરિસ્થિતિઓ, વાહનોનો ધુમાડો, પરાળી સળગાવવા, ફટાકડા ફોડવા અને અન્ય સ્થાનિક પ્રદૂષણ હવાની ગુણવત્તાને જોખમી બનાવે છે.
