ભારતમાં મોબાઈલ ફોનની નિકાસ 2024-25માં રૂ.2 લાખ કરોડના આંકને વટાવી ગઈ હતી. ગયા નાણાકીય વર્ષમાં આઈફોનની રૂ.1.5 લાખ કરોડની નિકાસ થઈ છે. 2023-24ની સરખામણીમાં 2024-25માં સ્માર્ટફોનની નિકાસ 54 ટકા વધી રૂ.2 લાખ કરોડને પાર થઈ હતી.
ભારતમાંથી નિકાસ થતી વસ્તુઓમાં સ્માર્ટફોન ટોચના ક્રમે છે. તેમાં પણ આઈફોનની નિકાસ જ રૂ.1.5 લાખ કરોડને પાર થઈ ગઈ છે. ઈલેક્ટ્રોનિક્સ મેન્યુફેક્ચરિંગ છેલ્લાં 10 વર્ષમાં પાંચ ગણાથી વધુ વધ્યું છે અને નિકાસ છ ગણાથી વધુ વધી છે.
સરકારે પ્રોડક્શન લિન્ક્ડ ઈન્સેન્ટિવ સ્કીમ (PLI) રજૂ કરી તેને કારણે અનેક ઈલેક્ટ્રોનિક્સ કંપનીઓએ મેન્યુફેક્ચરિંગમાં ઝંપલાવ્યું છે અને તેને કારણે નિકાસને બળ મળ્યું છે. એટલું જ નહીં, બીજી તરફ સ્માર્ટફોનની મોટાપાયે જે આયાત થતી હતી તેમાં પણ ઘટાડો થયો છે. આજે 99 ટકા સ્માર્ટફોન સ્થાનિક સ્તર પર ઉત્પાદન થયેલા છે. અમેરિકાની કંપની એપલ આઈફોન અત્યાર સુધી મોટાપાયે ચીનમાં આઈફોન તૈયાર કરાવતી હતી, પરંતુ છેલ્લાં કેટલાક વર્ષોમાં ભારતમાં તેનું મોટાપાયે ઉત્પાદન કરાવી રહી છે.
